બ્રિસ્બેન : ટેનિસ જગતની વર્તમાન સ્ટાર અને વિશ્વની નંબર વન ખેલાડી આર્યના સબાલેન્કાએ ઓસ્ટ્રેલિયન ઓપન પૂર્વે પોતાની તાકાતનો પરચો બતાવી દીધો છે. શનિવારે રમાયેલી બ્રિસ્બેન ઇન્ટરનેશનલની હાઈ-વોલ્ટેજ સેમિફાઇનલમાં બેલારુસની આ ખેલાડીએ ચેક રિપબ્લિકની કરોલિના મુચોવાને હરાવીને સતત ત્રીજા વર્ષે આ ટુર્નામેન્ટની ફાઇનલમાં પ્રવેશ મેળવ્યો છે.
પરફેક્ટ બદલો અને પાવર ગેમ
આ મેચ પહેલા સબાલેન્કા સામે મુચોવાનો રેકોર્ડ 3-1 નો હતો, એટલે કે સબાલેન્કા પર મુચોવા હંમેશા ભારે પડતી હતી. જોકે, આ વખતે સબાલેન્કા અલગ જ મૂડમાં હતી. તેણે મેચની શરૂઆતથી જ પોતાની પાવરફુલ સર્વિસ અને બેઝલાઇન ગેમ દ્વારા મુચોવાને દબાણમાં લાવી દીધી હતી. પ્રથમ સેટમાં સબાલેન્કાએ માત્ર પાવર જ નહીં પણ મેદાન પર ચપળતા બતાવી 6-3 થી સેટ પોતાના નામે કર્યો હતો.
સંઘર્ષ છતાં સબાલેન્કા અજેય
બીજા સેટમાં મુચોવાએ વળતો પ્રહાર કરવાનો પ્રયાસ કર્યો હતો અને રમતને 4-4 ની બરાબરી પર લાવી દીધી હતી. પરંતુ, ચાર વખતની ગ્રાન્ડ સ્લેમ વિજેતા સબાલેન્કાએ અણીના સમયે પોતાનો અનુભવ કામે લગાડ્યો હતો. તેણે પાંચમી ગેમ જીતીને 5-4 ની સરસાઈ મેળવી અને અંતે ચોથા મેચ પોઈન્ટ પર વિજય મેળવીને ફાઇનલની ટિકિટ કન્ફર્મ કરી હતી.
ઓસ્ટ્રેલિયન ઓપન માટે મજબૂત દાવેદારી
મેચ બાદ સબાલેન્કાએ ખુશી વ્યક્ત કરતા કહ્યું કે, "મુચોવા એક મજબૂત પ્રતિસ્પર્ધી છે, અને જો મેં તેને તક આપી હોત તો તે બાજી પલટી શકતી હતી. હું સીધા સેટમાં આ મેચ જીતીને અત્યંત ખુશ છું." આગામી 18 જાન્યુઆરીથી શરૂ થનારા ઓસ્ટ્રેલિયન ઓપન માટે સબાલેન્કા સૌથી પ્રબળ દાવેદાર માનવામાં આવે છે. ફાઇનલમાં હવે તેનો સામનો જેસિકા પેગુલા અથવા માર્ટા કોસ્ટ્યુક સામે થશે.
બીજી તરફ, પુરુષોની શ્રેણીમાં ડેનિલ મેદવેદેવ રવિવારે એલેક્સ મિશેલસન સામે ટકરાશે, જેના કારણે રવિવારનો દિવસ ટેનિસ પ્રેમીઓ માટે અત્યંત રોમાંચક બની રહેશે.