વડોદરા : ભારતીય ક્રિકેટના ‘પ્રિન્સ’ ગણાતા શુભમન ગિલને T20 વર્લ્ડ કપ 2026ની ટીમમાં સ્થાન ન મળતા ક્રિકેટ જગતમાં ભારે ચર્ચાઓ જાગી છે. રવિવારે વડોદરા ખાતે ન્યુઝીલેન્ડ સામે રમાનારી પ્રથમ વન-ડે મેચ પૂર્વે ગિલે આ વિષય પર પોતાનું મૌન તોડ્યું છે. પસંદગીકારોએ ગિલના સ્થાને અક્ષર પટેલને ઉપ-કેપ્ટન તરીકે પસંદ કરીને સૌને ચોંકાવી દીધા હતા, ત્યારે ગિલની પ્રતિક્રિયાની ચાહકો આતુરતાથી રાહ જોઈ રહ્યા હતા.
વડોદરામાં પ્રેસ કોન્ફરન્સ દરમિયાન ગિલે અત્યંત ગંભીરતાથી કહ્યું કે, "હું પસંદગીકારોના નિર્ણયનો પૂરો આદર કરું છું. મારું માનવું છે કે મારા ભાગ્યમાં જે લખાયેલું છે તે કોઈ મારી પાસેથી છીનવી શકતું નથી. દરેક ખેલાડી દેશ માટે સર્વશ્રેષ્ઠ પ્રદર્શન કરવાની ઈચ્છા રાખતો હોય છે, પણ અંતિમ નિર્ણય પસંદગીકારોનો હોય છે." ગિલે વધુમાં ઉમેર્યું કે તે અત્યારે જ્યાં છે ત્યાં ખુશ છે અને વર્લ્ડ કપ માટે ભારતીય ટીમને જીતની શુભેચ્છાઓ પાઠવે છે.
ગિલની વન-ડે ટીમમાં વાપસીને કારણે બેટિંગ ઓર્ડરમાં મોટા ફેરફારો જોવા મળી શકે છે. હાલમાં જ શાનદાર સદી ફટકારનાર યશસ્વી જયસ્વાલને કદાચ ગિલ માટે જગ્યા ખાલી કરવી પડશે. વળી, શ્રેયસ ઐયરની વાપસીથી નંબર 4ની પોઝિશન મજબૂત થશે. વિકેટકીપર તરીકે કે.એલ. રાહુલની પસંદગી લગભગ નક્કી હોવાથી ઋષભ પંતને બહાર બેસવું પડે તેવી શક્યતા છે. વિજય હજારે ટ્રોફીમાં શાનદાર પ્રદર્શન કરનાર રોહિત શર્મા અને વિરાટ કોહલી પર વડોદરાની જનતાની ખાસ નજર રહેશે.
વડોદરાના કોટામ્બી સ્થિત નવા બરોડા ક્રિકેટ એસોસિએશન સ્ટેડિયમ માટે આ મેચ ઐતિહાસિક બની રહેશે. આ મેદાન પર પ્રથમ વખત પુરુષોની આંતરરાષ્ટ્રીય મેચ રમાવા જઈ રહી છે. અગાઉ અહીં માત્ર મહિલા ક્રિકેટ મેચો યોજાઈ હતી. પીચનો મિજાજ કેવો રહેશે તે ખેલાડીઓ માટે સૌથી મોટો કોયડો છે. 11 જાન્યુઆરીએ રમાનારી આ મેચમાં ભારત વિજયી પ્રારંભ કરવા માટે ઉત્સુક છે.
ગિલના આ નિવેદને સાબિત કર્યું છે કે તે ભલે T20 ફોર્મેટમાં બહાર હોય, પણ વન-ડેમાં તે પોતાની તાકાત બતાવવા માટે પૂરી રીતે તૈયાર છે