મુંબઈ:  ભારતીય ક્રિકેટ કંટ્રોલ બોર્ડ (BCCI) એ આગામી ICC મેન્સ T20 વર્લ્ડ કપ 2026 માટે જ્યારે ભારતીય ટીમની જાહેરાત કરી, ત્યારે સૌથી મોટું આશ્ચર્ય યશસ્વી જયસ્વાલનું નામ ગાયબ જોઈને થયું હતું. પસંદગીકારોએ શુભમન ગિલના ખરાબ ફોર્મને કારણે તેને પડતો મૂકીને ઇશાન કિશનને ટીમમાં સ્થાન આપ્યું છે, પરંતુ આંકડાકીય રીતે જોઈએ તો જયસ્વાલ ટીમમાં સ્થાન મેળવવા માટે સૌથી પ્રબળ દાવેદાર હતો. T20 આંતરરાષ્ટ્રીય ક્રિકેટમાં જયસ્વાલનો સ્ટ્રાઇક રેટ 160 થી પણ વધુ છે અને સરેરાશ 36.15 છે, જે પસંદ કરાયેલા મોટાભાગના ટોચના બેટ્સમેનો કરતા ઘણી સારી છે. સૂર્યકુમાર યાદવના નેતૃત્વમાં જાહેર થયેલી આ ટીમમાં જયસ્વાલની ગેરહાજરી હવે મોટો વિવાદ જગાવી રહી છે.

વર્લ્ડ કપની ટીમમાં સામેલ બેટ્સમેનોના આંકડા પર નજર કરીએ તો, અભિષેક શર્મા અને સૂર્યકુમાર યાદવની સરેરાશ 35 ની આસપાસ છે, જ્યારે સંજુ સેમસન અને ઇશાન કિશનની સરેરાશ તો માત્ર 25 ની આસપાસ જ છે. જોકે તિલક વર્મા (49+) અને રિંકુ સિંહ (42+) સરેરાશમાં આગળ છે, પરંતુ જયસ્વાલ જે આક્રમકતા અને સાતત્ય સાથે રન બનાવે છે તેનો કોઈ જોટો નથી. રિંકુ સિંહનો સ્ટ્રાઇક રેટ જરૂર 161 ની આસપાસ છે, પરંતુ પાવરપ્લેમાં રન ગતિ વધારવા માટે જયસ્વાલ જેવી ક્ષમતા અન્ય કોઈ ઓપનર પાસે અત્યારે દેખાતી નથી. પસંદગીકારોના આ નિર્ણયથી ફેન્સ પણ આશ્ચર્યચકિત છે કે આટલા ઉમદા ફોર્મમાં હોવા છતાં તેને કેમ નજરઅંદાજ કરાયો.

T20 વર્લ્ડ કપ 2026 ની શરૂઆત 7 ફેબ્રુઆરીથી થવા જઈ રહી છે. આ વખતે ટુર્નામેન્ટનું આયોજન ભારત અને શ્રીલંકા દ્વારા સંયુક્ત રીતે કરવામાં આવી રહ્યું છે. પ્રથમ દિવસે જ ત્રણ હાઈ-વોલ્ટેજ મેચો રમાશે, જેમાં ભારતીય ટીમ મુંબઈના ઐતિહાસિક વાનખેડે સ્ટેડિયમમાં યુએસએ સામે ટકરાશે. ટુર્નામેન્ટમાં કુલ 20 ટીમો ભાગ લઈ રહી છે, જેમને ચાર ગ્રુપમાં વહેંચવામાં આવી છે. દરેક ગ્રુપની ટોચની બે ટીમો સુપર-8 માં પહોંચશે અને ત્યારબાદ સેમીફાઈનલની જંગ ખેલાશે. ફાઈનલ મેચ 8 માર્ચે રમાશે, જેના માટે અમદાવાદનું નરેન્દ્ર મોદી સ્ટેડિયમ અથવા કોલંબોનું મેદાન નક્કી કરવામાં આવશે.

હાલ પૂરતું, માત્ર ભારત જ એક એવો દેશ છે જેણે પોતાની 15 સભ્યોની ટીમ જાહેર કરી છે. ટીમમાં હાર્દિક પંડ્યા, શિવમ દુબે અને અક્ષર પટેલ (ઉપ-કેપ્ટન) જેવા ઓલરાઉન્ડરોની ભરમાર છે, તો બોલિંગમાં જસપ્રીત બુમરાહ અને કુલદીપ યાદવ જેવા દિગ્ગજો કમાન સંભાળશે. જોકે, આક્રમક ઓપનિંગ જોડીમાં જયસ્વાલનું નામ ન હોવું એ ટુર્નામેન્ટ દરમિયાન ભારતને ભારે પડી શકે છે કે કેમ તે તો સમય જ કહેશે. અત્યારે તો ક્રિકેટ પંડિતો આ મામલે સિલેક્ટર્સના વિઝન પર સવાલો ઉઠાવી રહ્યા છે.