નવી દિલ્હી : ફેબ્રુઆરી-માર્ચ ૨૦૨૬માં રમાનારા T20 વર્લ્ડ કપ માટે શનિવારે જ્યારે ભારતીય ટીમની જાહેરાત કરવામાં આવી, ત્યારે ક્રિકેટ જગતમાં મોટો ખળભળાટ મચી ગયો છે. પસંદગીકારોએ માત્ર સ્ટાર બેટ્સમેન શુભમન ગિલને ટીમમાંથી બહાર કરીને સૌને ચોંકાવ્યા નથી, પરંતુ ઉપ-કપ્તાન (Vice Captain) તરીકે હાર્દિક પંડ્યાને બદલે ગુજરાતના 'બાપુ' એટલે કે અક્ષર પટેલના નામની જાહેરાત કરીને મોટી સર્જરી કરી છે. અત્યાર સુધી શુભમન ગિલ ઉપ-કપ્તાન હતો, પરંતુ તે ટીમમાં ન હોવાથી હવે આ જવાબદારી અક્ષર પટેલને સોંપવામાં આવી છે.
એક સમયે હાર્દિક પંડ્યા ટીમ ઈન્ડિયાના કેપ્ટન પદ માટે સૌથી પ્રબળ દાવેદાર હતો અને ૨૦૨૪ના વર્લ્ડ કપમાં તે વાઈસ કેપ્ટન પણ હતો. સૂત્રોના જણાવ્યા અનુસાર, ઉપ-કપ્તાન માટે હાર્દિકના નામની ચર્ચા જરૂર થઈ હતી, પરંતુ તેનો ઈજાઓનો ઈતિહાસ (Injury History) તેના માર્ગમાં અવરોધ બન્યો છે. પસંદગીકારો લાંબા ગાળાના વિકલ્પ તરીકે એવા ખેલાડીને જોવા માંગતા હતા જે મેદાન પર સતત હાજર રહી શકે, અને તેમાં અક્ષર પટેલ બાજી મારી ગયો છે. અક્ષર પટેલનું ટીમમાં સ્થાન સુરક્ષિત છે અને તેનું પ્રદર્શન પણ સાતત્યપૂર્ણ રહ્યું છે.
મુખ્ય પસંદગીકાર અજીત અગરકરે પ્રેસ કોન્ફરન્સમાં આ નિર્ણય પાછળનું તર્ક આપતા કહ્યું કે, "જ્યારે શુભમન ગિલ ટીમમાં નહોતો, ત્યારે અક્ષર પટેલે જ ઉપ-કપ્તાનની જવાબદારી નિભાવી હતી. ૨૦૨૫ની શરૂઆતમાં ઈંગ્લેન્ડ સામેની શ્રેણીમાં પણ અક્ષર વાઈસ કેપ્ટન હતો. તેથી, ગિલની ગેરહાજરીમાં અમે એ જ વ્યવસ્થાને આગળ ધપાવવાનો નિર્ણય લીધો છે." અગરકરના આ નિવેદનથી સ્પષ્ટ થાય છે કે ટીમ મેનેજમેન્ટ હવે ગિલ અને હાર્દિક કરતા અક્ષર પર વધુ ભરોસો કરી રહ્યું છે.
વર્લ્ડ કપની આ ટીમમાં માત્ર કેપ્ટનશીપ જ નહીં, પરંતુ બેટિંગ લાઈનઅપમાં પણ મોટા ફેરફારો જોવા મળ્યા છે. ખરાબ ફોર્મને કારણે શુભમન ગિલને બહારનો રસ્તો દેખાડી દેવાયો છે, જ્યારે વિસ્ફોટક બેટ્સમેન ઈશાન કિશનની ટીમમાં વાપસી થઈ છે. બીજી તરફ, કેપ્ટન સૂર્યકુમાર યાદવે પોતાના ફોર્મ અંગે થઈ રહેલી ટીકાઓનો જવાબ આપતા કહ્યું છે કે, "જ્યારે રન બનાવવાની જરૂર પડશે ત્યારે ચોક્કસ આવશે." હવે જોવાનું એ રહેશે કે સૂર્યા અને અક્ષરની આ નવી જોડી ભારતને ફરી એકવાર વિશ્વ વિજેતા બનાવી શકશે કે કેમ.