તા. ૧૧ નવેમ્બર ર૦ર૬ વિક્રમ સંવત ર૦૮૩ કારતક સુદ – ૨ બુધવાર
ટીમ ઇન્ડિયાએ શરૂઆતથી જ મેચ પર પકકડ જમાવી'તી
અર્શદીપ, હર્ષિત, વરૂણ અને કુલદિપે સાઉથ આફ્રિકાની બેટીંગ લાઇનઅપને તોડી નાંખીઃ અભિષેક, ગિલ બાદ તિલક મેચને જીત તરફ દોરી ગયાઃ બુધવારે ચોથો ટી-૨૦
નવી દિલ્હીઃ ભારત અને દક્ષિણ આફ્રિકા વચ્ચે ધર્મશાલામાં રમાયેલી ત્રીજી ટી૨૦ મુકાબલો ક્રિકેટપ્રેમીઓ માટે સંપૂર્ણ રીતે ભારતના પ્રભુત્વનો સાક્ષી બન્યું. હિમાચલ પ્રદેશના સુંદર પહાડી માહોલ વચ્ચે રમાયેલી આ મેચમાં ભારતીય ટીમે સાત વિકેટે વિજય મેળવી પાંચ મેચોની શ્રેણીમાં ૨-૧ની મહત્વપૂર્ણ લીડ મેળવી લીધી. ટોસ જીતીને ભારતીય કેપ્ટન સૂર્યકુમાર યાદવે પહેલા બોલિગ કરવાનો નિર્ણય લીધો, જે આખરે સંપૂર્ણ રીતે યોગ્ય સાબિત થયો.
દક્ષિણ આફ્રિકાની શરૂઆત ખૂબ જ નબળી રહી. પ્રથમ જ ઓવરમાં અર્શદીપ સિહે રીઝા હેન્ડ્રિક્સને શૂન્ય પર પેવેલિયન પરત મોકલ્યા. ત્યારબાદ હર્ષિત રાણાએ ક્વિન્ટન ડિકોકની કિમતી વિકેટ ઝડપી લીધી. માત્ર થોડી ઓવરમાં જ દક્ષિણ આફ્રિકાની ટોપ ઓર્ડર ધરાશાયી થઈ ગઈ અને દબાણ સતત વધતું ગયું. પાવરપ્લે દરમિયાન જ મહેમાન ટીમે પોતાના મુખ્ય બેટ્સમેન ગુમાવી દીધા હતા.
મધ્યક્રમમાં માર્કરમે એકલા હાથે સંઘર્ષ કર્યો અને અડધી સદીનો આંકડો પાર કર્યો, પરંતુ અન્ય કોઈ બેટ્સમેન તેમની સાથે લાંબી ભાગીદારી ઊભી કરી શક્યો નહીં. હાર્દિક પંડ્યાએ સ્ટબ્સને આઉટ કરીને ટી૨૦ ક્રિકેટમાં પોતાના ૧૦૦ વિકેટ પૂર્ણ કરી જે ભારતીય ટીમ માટે ગૌરવપૂર્ણ ક્ષણ રહી. વરૂન ચક્રવર્તી અને કુલદીપ યાદવની સ્પિન જોડીએ દક્ષિણ આફ્રિકાની ઇનિગ્સને સંપૂર્ણ રીતે કાબૂમાં રાખી.
અંતે દક્ષિણ આફ્રિકાની ટીમ ૧૧૭ રનમાં ઓલઆઉટ થઈ ગઈ. ભારતીય બોલરોની શિસ્તબદ્ધ લાઇન-લેન્થ અને સતત દબાણના કારણે વિરોધી ટીમ કોઈ મોટો સ્કોર ઊભો કરી શકી નહીં. અર્શદીપ, હર્ષિત રાણા, વરૂન અને કુલદીપે મળીને બેટિગ લાઈન અપને તોડી નાખી.
૧૧૮ રનના સરળ લક્ષ્યનો પીછો કરવા ઉતરેલી ભારતીય ટીમે આત્મવિશ્વાસભરી શરૂઆત કરી. શુભમન ગિલ અને અભિષેક શર્માએ ઝડપી રન બનાવી દક્ષિણ આફ્રિકાના બોલરો પર શરૂઆતથી જ દબાણ ઊભું કર્યું. અભિષેક શર્મા આક્રમક અંદાજમાં બેટિગ કરી રહ્યા હતા, પરંતુ તેઓ ૩૫ રન બનાવી આઉટ થયા. ત્યારબાદ પણ ભારતીય ઇનિગ્સની ગતિ ધીમી પડી નહોતી.
શુભમન ગિલ અને તિલક વર્માએ ઇનિગ્સને સ્થિરતા આપી અને મેચને ભારત તરફ વાળતા રહ્યા. ગિલ આઉટ થયા બાદ સૂર્યકુમાર યાદવ થોડા સમય માટે ક્રિઝ પર આવ્યા, પરંતુ મોટી ઇનિગ્સ રમવામાં સફળ રહ્યા નહીં. તેમ છતાં, તિલક વર્માની શાંતિપૂર્ણ અને સમજદારીભરી બેટિગે ટીમને જીતની નજીક પહોંચાડી. અંતે શિવમ દુબે અને તિલક વર્માએ સાથે મળી ૧૬મા ઓવરમાં જ મેચ પૂર્ણ કરી દીધી. ભારતે માત્ર ત્રણ વિકેટ ગુમાવીને આ લક્ષ્ય હાંસલ કર્યું અને શ્રેણીમાં મજબૂત લીડ મેળવી. આ જીતથી ટીમ ઇન્ડિયાનો આત્મવિશ્વાસ વધુ મજબૂત થયો છે અને આવનારા મેચોમાં પણ ટીમનો મોરાલ ઊંચો રહેશે.
ધર્મશાલાની પિચ પર બોલરો અને બેટ્સમેન બંને માટે મળેલી મદદ વચ્ચે ભારતીય ટીમે સંતુલિત પ્રદર્શન કર્યું. આ મેચે સ્પષ્ટ કરી દીધું કે ભારતીય ટીમ હાલમાં દરેક વિભાગમાં દક્ષિણ આફ્રિકા કરતાં એક પગથિયુ આગળ છે. હવે તમામની નજર શ્રેણીના ચોથી મેચ પર રહેશે, જ્યાં દક્ષિણ આફ્રિકા વાપસી કરવાનો પ્રયાસ કરશે અને ભારત પોતાની લીડ મજબૂત બનાવવા ઉતરશે.
(11:23 AM IST)
છેલ્લા 8 દિવસમાં સૌથી લોકપ્રિય 
