અમદાવાદ : ભારતીય પુરુષોની અંડર-17 ફૂટબોલ ટીમે અમદાવાદના EKA એરેના ખાતે રમાયેલા AFC U17 એશિયન કપ 2026 ક્વોલિફાયરની નિર્ણાયક મેચમાં ઈરાનને 2-1થી હરાવીને મોટી સિદ્ધિ હાંસલ કરી છે. આ વિજય સાથે, ભારતીય ટીમે સાઉદી અરેબિયામાં યોજાનારા 2026 AFC અંડર-17 એશિયન કપના મુખ્ય ડ્રોમાં સ્થાન નિશ્ચિત કરી લીધું છે.
આ જીતને કારણે 'બ્લુ કોલ્ટ્સ' તરીકે ઓળખાતી ભારતીય ટીમના ક્વોલિફાયર પોઈન્ટ્સ વધીને 7 થઈ ગયા છે. જોકે ઈરાનના પણ 7 પોઈન્ટ હતા, પરંતુ હેડ-ટુ-હેડ મેચોમાં ભારતના ઊંચા પોઈન્ટને કારણે યજમાન ટીમ ઈરાન પર આગળ નીકળી ગઈ અને ગ્રુપ D માં ટોચ પર રહી.
કેન્દ્રીય મંત્રીએ પાઠવ્યા અભિનંદન
યુવા બાબતો અને રમતગમતના કેન્દ્રીય મંત્રી ડૉ. મનસુખ માંડવિયાએ ભારતીય ટીમને તેમની આ ઐતિહાસિક જીત અને AFC અંડર-17 એશિયન કપ માટે ક્વોલિફાય થવા બદલ હૃદયપૂર્વક અભિનંદન પાઠવ્યા હતા.
તેમણે એક સોશિયલ મીડિયા પોસ્ટમાં યુવા ખેલાડીઓના પ્રયાસોની પ્રશંસા કરતા કહ્યું કે આ જીત યુવા ખેલાડીઓ, તેમના કોચ અને સમગ્ર સપોર્ટ સ્ટાફના સમર્પણ અને મહેનતને પ્રતિબિંબિત કરે છે.
આગામી વર્ષે એશિયન કપમાં રમવા માટે ક્વોલિફાય થનારી સિનિયર મહિલા ટીમ, અંડર-20 મહિલા ટીમ અને અંડર-17 મહિલા ટીમ પછી, આ ચોથી ભારતીય ટીમ છે જે ખંડની પ્રતિષ્ઠિત ટૂર્નામેન્ટમાં ભાગ લેશે.