કૈરો (ઇજિપ્ત) : ISSF વર્લ્ડ ચેમ્પિયનશિપમાં આજે ભારતીય શૂટર્સે બે રજત પદક (Silver Medals) જીતીને દેશનું ગૌરવ વધાર્યું છે.

એશા સિંહ-સમ્રાટ રાણાની મિક્સડ સિલ્વર:
10 મીટર એર પિસ્તોલ મિક્સડ ટીમ ઇવેન્ટમાં ભારતની યુવા જોડી એશા સિંહ અને સમ્રાટ રાણા ફાઇનલમાં પહોંચી હતી. જોકે, ગોલ્ડ મેડલ મેચમાં તેમને ચીનની કિઆનક્સુન યાઓ અને કાઈ હુની જોડી સામે 10-16થી હારનો સામનો કરવો પડ્યો હતો, જેના કારણે તેમણે રજત પદકથી સંતોષ માનવો પડ્યો.

સમ્રાટ રાણા ઉત્તમ ફોર્મમાં હોવા છતાં, એશા સિંહ લય પકડવામાં ચૂકી ગઈ હતી, જે ગોલ્ડ મેડલ માટે નિર્ણાયક સાબિત થયું.

ઐશ્વર્યાનો વર્લ્ડ રેકોર્ડ પછી સિલ્વર:
પુરુષોની 50 મીટર રાઇફલ 3 પોઝિશન્સ (3P) ઇવેન્ટમાં, 24 વર્ષીય સ્ટાર શૂટર ઐશ્વર્યા પ્રતાપ સિંહ તોમરએ શાનદાર પ્રદર્શન કર્યું હતું. તેણે ક્વોલિફિકેશન રાઉન્ડમાં 597-40x ના વર્લ્ડ રેકોર્ડ સ્કોર સાથે ટોચનું સ્થાન મેળવ્યું હતું.

ફાઇનલમાં, ઐશ્વર્યા ચીનના યુકુન લિયુ (467.1) થી માત્ર 0.2 પોઈન્ટથી પાછળ રહીને બીજા સ્થાને રહ્યો અને સિલ્વર મેડલ જીત્યો. છેલ્લા શૉટમાં 9.8ના સ્કોરથી તેને ગોલ્ડ ગુમાવવો પડ્યો હતો.

આજના પ્રદર્શન સાથે, ભારત હવે ત્રણ ગોલ્ડ, પાંચ સિલ્વર અને ત્રણ બ્રોન્ઝ મેડલ સાથે ચીન પછી મેડલ ટેલીમાં બીજા સ્થાને મજબૂત રીતે ટકી રહ્યું છે.