નવી દિલ્હી: ઓસ્ટ્રેલિયા સામેની સેમિફાઇનલ પહેલા ભારતને મોટો ઝટકો લાગ્યો છે. ઓપનર પ્રતિકા રાવલ ગુરુવારે નવી મુંબઈના ડીવાય પાટિલ સ્ટેડિયમમાં રમાનારી નિર્ણાયક મેચમાંથી બહાર થઈ ગઈ છે. 26 ઓક્ટોબરે બાંગ્લાદેશ સામેની મેચની 21મી ઓવરમાં બાઉન્ડ્રી રોકવાનો પ્રયાસ કરતી વખતે પ્રતિકાને પગની ઘૂંટીમાં ઈજા થઈ હતી. ત્યારબાદ ફિઝિયો અને સાથી ખેલાડીઓએ તેને મેદાનની બહાર લઈ ગયા. તેની ગેરહાજરીમાં, અમનજોત કૌરને ઉપ-કેપ્ટન સ્મૃતિ મંધાના સાથે ઓપનિંગ બેટ્સમેન તરીકે મોકલવામાં આવી હતી. જોકે, વરસાદને કારણે મેચ રદ કરવામાં આવી હતી.જાણવા મળ્યું છે કે પ્રતિકાને ઈજા બાદ સ્કેન માટે હોસ્પિટલમાં લઈ જવામાં આવી હતી.સોમવારે સૂત્રોએ  જણાવ્યું હતું કે, "આધિકારિક નિવેદન હજુ આવવાનું બાકી છે, પરંતુ પ્રારંભિક અંદાજ મુજબ પ્રતિકા સેમિફાઇનલ રમશે નહીં. બાંગ્લાદેશ સામેની તેની ઈજાના પ્રકારને જોતાં, ત્રણ દિવસમાં આટલી મહત્વપૂર્ણ મેચ માટે ફિટ થવું અત્યંત મુશ્કેલ છે. જો તે બાકીના વર્લ્ડ કપમાંથી પણ બહાર થઈ જાય તો આશ્ચર્યજનક નહીં હોય."પ્રતિકા રાવલ આ વર્લ્ડ કપમાં બીજા ક્રમે સૌથી વધુ રન બનાવનાર ખેલાડી છે. તેણીએ સાત મેચમાં છ ઇનિંગ્સમાં 51.33 ની સરેરાશથી 308 રન બનાવ્યા છે. જો પ્રતિકા વર્લ્ડ કપમાંથી બહાર થઈ જાય છે, તો ભારતીય ટીમ મેનેજમેન્ટ ડિફેન્ડિંગ ચેમ્પિયન ઓસ્ટ્રેલિયા સામેની મહત્વપૂર્ણ મેચ પહેલા ઇજાગ્રસ્ત ખેલાડીના સ્થાને કોઈ ખેલાડી શોધશે. આ માટે BCCI એ ICC ટેકનિકલ કમિટી પાસેથી મંજૂરી લેવી પડશે.રિઝર્વ ખેલાડીઓની વાત કરીએ તો, તેજલ હસાબનીસ એકમાત્ર નિષ્ણાત બેટ્સમેન છે. શેફાલી વર્મા આ યાદીમાં નથી, પરંતુ તે બહારનો વિકલ્પ હોઈ શકે છે.2025 મહિલા વર્લ્ડ કપમાં ઓસ્ટ્રેલિયા પોઈન્ટ ટેબલમાં ટોચ પર હતું, તેણે સાતમાંથી છ મેચ જીતી હતી. આ ટીમ અત્યાર સુધી એક પણ મેચ હારેલી નથી, જ્યારે ભારત 7 માંથી 3 મેચ જીતીને પોઈન્ટ ટેબલમાં ચોથા સ્થાને રહ્યું છે. ભારત અને ઓસ્ટ્રેલિયા વચ્ચેની આ મેચ જીતનારી ટીમ 2 નવેમ્બરના રોજ ટાઇટલ મેચમાં પ્રવેશ કરશે, જ્યાં તેનો સામનો ઇંગ્લેન્ડ અને દક્ષિણ આફ્રિકા વચ્ચેની સેમિફાઇનલ મેચના વિજેતા સાથે થશે.