નવી દિલ્હી: ભારતીય ક્રિકેટ ટીમના ઉભરતા સ્ટાર અને ૨૦૨૫ એશિયા કપમાં પાકિસ્તાન સામે ભારતની જીતનો હીરો તિલક વર્માએ પોતાના જીવન સાથે જોડાયેલો એક અત્યંત ગંભીર ખુલાસો કર્યો છે. તિલક વર્માએ જણાવ્યું કે ૨૦૨૨ના બાંગ્લાદેશ પ્રવાસ દરમિયાન તેમને રેબડોમાયોલિસિસ (Rhabdomyolysis) નામની જીવલેણ બીમારીનું નિદાન થયું હતું, જેના કારણે તેમનું શરીર સંપૂર્ણપણે લકવાગ્રસ્ત થઈ ગયું હતું.
'બ્રેકફાસ્ટ વિથ ચેમ્પિયન્સ'ના તાજેતરના એપિસોડમાં તિલકે જણાવ્યું કે, આ તેમની પ્રથમ IPL સીઝન પછીની વાત છે. ટેસ્ટ ટીમમાં સ્થાન મેળવવાના લક્ષ્ય સાથે તેઓ ફિટનેસ માટે વધુ પડતી તાલીમ લેતા હતા અને શરીરને આરામ આપતા નહોતા.
તિલકે સમજાવ્યું, "આરામના દિવસોમાં પણ હું જીમમાં જ રહેતો હતો. મારા સ્નાયુઓ વધુ પડતા તાણમાં હતા અને આખરે તૂટી ગયા. એક મેચ દરમિયાન અચાનક મારી આંખોમાંથી આંસુ આવવા લાગ્યા અને મારી આંગળીઓએ કામ કરવાનું બંધ કરી દીધું. બધું પથ્થર જેવું લાગતું હતું."
ઈજાને કારણે તેમને મેદાન છોડવું પડ્યું હતું અને તેમની આંગળીઓ હલતી ન હોવાથી તેમના મોજા કાપીને કાઢવા પડ્યા હતા.
લકવાગ્રસ્ત જેવી સ્થિતિમાં તેમને તાત્કાલિક હોસ્પિટલમાં દાખલ કરવામાં આવ્યા હતા. તિલકે જણાવ્યું કે આ મુશ્કેલ સમયમાં મુંબઈ ઇન્ડિયન્સના માલિક આકાશ અંબાણી અને ભૂતપૂર્વ BCCI સચિવ જય શાહની મદદથી તેમને સમયસર સારવાર મળી.
ડૉક્ટરોએ તિલકને ચેતવણી આપી હતી કે, "જો થોડા કલાકોનો પણ વિલંબ થયો હોત તો તેમના જીવને જોખમ થઈ શકતું હતું." તેમણે કહ્યું કે હોસ્પિટલમાં તેમની હાલત એટલી ખરાબ હતી કે IV લાઇન નાખવા માટેની સોય પણ તૂટી રહી હતી. તિલકની માતા તે સમયે તેમની સાથે હતી.
તિલક હવે સંપૂર્ણ સ્વસ્થ છે અને ક્રિકેટ જગતમાં ધૂમ મચાવી રહ્યો છે