નવી દિલ્હી, તા. 22 : મહિલા ક્રિકેટના ચાહકો માટે મોટા સમાચાર! મહિલા પ્રીમિયર લીગ (WPL)ની આગામી સિઝન 2026ની હરાજીની તારીખ અને સ્થળ અંગે મોટી માહિતી સામે આવી છે. જોકે BCCI દ્વારા હજી સુધી સત્તાવાર જાહેરાત કરવામાં આવી નથી, પરંતુ ફ્રેન્ચાઇઝીઓને આ અંગે અનૌપચારિક રીતે જાણ કરી દેવામાં આવી છે.

અહેવાલ મુજબ, WPL 2026ની હરાજીનું આયોજન દેશની રાજધાની દિલ્હીમાં થવા જઈ રહ્યું છે.

ક્યારે થશે ખેલાડીઓની બોલી?
અહેવાલો અનુસાર, ખેલાડીઓની હરાજી 26-27 નવેમ્બર, 2025 દરમિયાન યોજાશે.

• BCCI દ્વારા અગાઉ સંકેત આપવામાં આવ્યો હતો કે હરાજી 26 થી 29 નવેમ્બરની વચ્ચે થઈ શકે છે.

• એવી અપેક્ષા રાખવામાં આવે છે કે આખી હરાજી એક જ દિવસમાં પૂર્ણ થઈ જશે.

એક જ દિવસમાં હરાજી પૂરી થવાની શક્યતા કેમ?
WPLમાં માત્ર પાંચ ટીમો છે અને દરેક ટીમમાં વધુમાં વધુ 18 ખેલાડીઓને રાખવાની છૂટ છે. જો 90 ખેલાડીઓની હરાજી કરવામાં આવે તો પણ ટીમની સંખ્યા ઓછી હોવાને કારણે મેગા ઓક્શનમાં વધુ સમય લાગવાની શક્યતા ઓછી છે અને તેથી BCCI આ કાર્યક્રમને એક દિવસમાં જ પૂરો કરી શકે છે.

હવે ચાહકો અને ફ્રેન્ચાઇઝી માલિકોની નજર BCCIની સત્તાવાર જાહેરાત પર ટકેલી છે, જે ટૂંક સમયમાં આવવાની ધારણા છે.