નવી દિલ્હી : ભારત અને ઓસ્ટ્રેલિયા વચ્ચે ૧૯ ઓક્ટોબરથી શરૂ થનારી ODI શ્રેણી માટે ટીમ ઈન્ડિયા રવાના થઈ ગઈ છે. એરપોર્ટ પર ખેલાડીઓ વચ્ચે જોવા મળેલો ભાવનાત્મક લગાવ, ખાસ કરીને ભૂતપૂર્વ કેપ્ટન રોહિત શર્મા અને નવા ODI કેપ્ટન શુભમન ગિલ વચ્ચેનો 'ભારત મિલાપ', સોશિયલ મીડિયા પર છવાઈ ગયો છે.

કેપ્ટનશીપના ઘોંઘાટ વચ્ચે લાગણીઓ અકબંધ:
થોડા સમય પહેલા જ BCCI એ મોટો નિર્ણય લેતા ODI ટીમની કેપ્ટનશીપ રોહિત શર્મા પાસેથી લઈને યુવા બેટ્સમેન શુભમન ગિલને સોંપી હતી. આ નિર્ણયથી રોહિતના ચાહકો અને કેટલાક ક્રિકેટ દિગ્ગજો નારાજ થયા હતા.

જોકે, એરપોર્ટ પર બંને ખેલાડીઓ એ જ ઉષ્મા સાથે મળ્યા, જેણે તમામ અટકળો પર પૂર્ણવિરામ મૂકી દીધો. વાયરલ થયેલા વીડિયોમાં રોહિત શર્મા ગિલ પાસે જઈને હસતાં-હસતાં કહે છે: "હે હીરો, કેમ છો?" આ વીડિયોએ સાબિત કરી દીધું કે મેદાનની બહાર ખેલાડીઓ વચ્ચેનું જોડાણ મજબૂત છે.

શુભમન ગિલે પણ દિગ્ગજ બેટ્સમેન વિરાટ કોહલી સાથે હસ્તધૂનન કર્યું હતું, જે પણ શ્રેયસ ઐયર સાથે વાત કરતા જોવા મળ્યા હતા.

રોહિત-કોહલીની છેલ્લી ODI શ્રેણી?
મીડિયા રિપોર્ટ્સ મુજબ, આ ઓસ્ટ્રેલિયા સામેની ODI શ્રેણી રોહિત શર્મા અને વિરાટ કોહલી માટે છેલ્લી ODI શ્રેણી હોઈ શકે છે. બંને ખેલાડીઓ પહેલેથી જ ટેસ્ટ અને T20 ફોર્મેટમાંથી નિવૃત્તિ લઈ ચૂક્યા છે અને હવે ODI માંથી પણ નિવૃત્તિ લે તેવી શક્યતા છે.

જોકે રોહિત શર્માએ ૨૦૨૭ વર્લ્ડ કપ રમવાની ઈચ્છા વ્યક્ત કરી હતી, પણ મુખ્ય પસંદગીકાર અજીત અગરકરના નિવેદનથી સ્પષ્ટ થયું છે કે ૨૦૨૭ વર્લ્ડ કપમાં કોઈ ખેલાડીના ભાગ લેવાની પુષ્ટિ હજુ સુધી કરવામાં આવી નથી.

ખેર, ક્રિકેટ ચાહકો માટે, આ વીડિયો એક યાદ અપાવે છે કે ટીમ સ્પિરિટ અને ખેલાડીઓ વચ્ચેનો પ્રેમ કેપ્ટનશીપના ફેરફારોથી ઉપર છે.