તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
પાકિસ્તાનનું નાટકઃ પહેલા બોયકોટની ધમકી અને પછી નીચી મૂંડીએ મેચ રમવા રાજી
મેચ થશે કે નહીં તેને લઈને અસમંજસની સ્થિતિ પેદા થઈ હતી, જોકે પીસીબી અને આઈસીસીના અધિકારીઓની બેઠક બાદ પાકિસ્તાનની ટીમ મેચ રમવા માટે રાજી થઈ
દુબઈ,તા.૧૮: પાકિસ્તાને એશિયા કપનો બહિષ્કાર કરવાની ધમકી આપી છે. ગઈકાલે એશિયા કપની ૧૦મી મેચ હતી જેમાં પાકિસ્તાન અને યુએઈ વચ્ચે મેચ થવાની હતી પણ શરુઆતમાં પાકિસ્તાને રમવાનો ઇન્કાર કર્યો. જે બાદ મેચ થશે કે નહીં તેને લઈને અસમંજસની સ્થિતિ પેદા થઈ હતી. જોકે PCB અને ICCના અધિકારીઓની બેઠક બાદ પાકિસ્તાનની ટીમ મેચ રમવા માટે રાજી થઈ હતી.
PCBએ પાકિસ્તાનના ખેલાડીઓને આદેશ આપ્યા હતા કે તેઓ હોટલમાં જ રહે અને તેમને જ્યાં સુધી કહેવામાં ન આવે ત્યાં સુધી સ્ટેડિયમ માટે રવાના થાય નહીં. જોકે એક કલાકના વિલંબ બાદ ખેલાડીઓ સ્ટેડિયમ માટે રવાના થઈ ગયા હતા.
જો ગઈકાલે મેચ ના થઈ હોત તો પાકિસ્તાનની ટીમ એશિયા કપ ટૂર્નામેન્ટથી બહાર થઈ ગઈ હોત. UAEની ટીમને બે પોઇન્ટ મળી જતાં તે મેચ રમ્યા વિના જ સુપર-૪ માટે ક્વોલિફાય થઈ ગઈ હોત.
રવિવારે ભારત અને પાકિસ્તાન વચ્ચે મુકાબલો થયો હતો. આ મેચમાં ભારતની જીત થઈ હતી. જોકે મેચ બાદ ભારતના ખેલાડીઓએ પાકિસ્તાનના ખેલાડીઓ સાથે હાથ મિલાવ્યો નહોતો અને ડ્રેસિંગ રૂમનો દરવાજો બંધ કરી નાંખ્યો હતો. જે બાદથી પાકિસ્તાન ક્રિકેટ બોર્ડ રોષે ભરાયું હતું. પાકિસ્તાની ક્રિકેટ બોર્ડે ભારતીય ટીમ વિરુદ્ધ આરોપો લગાવ્યા. બાદમાં ICCમાં ફરિયાદ નોંધાવી મેચ રેફરીને પદથી હટાવવા માંગ કરી હતી.
પાકિસ્તાની ક્રિકેટ બોર્ડનો દાવો છે કે ભારત સાથેની મેચમાં મેચ રેફરી પાયક્રોફટે પાકિસ્તાની ટીમના કેપ્ટન સલમાન અલી આગાને કહ્યું હતું કે તેઓ ટોસ સમયે સૂર્યકુમાર યાદવ સાથે હાથ ન મિલાવે, જે નિયમોનું ઉલ્લંઘન છે. જોકે પાકિસ્તાની ક્રિકેટ બોર્ડની માંગ સ્વીકારાઈ કે નહીં તે અંગે કોઈ સ્પષ્ટીકરણ આવ્યું નહોતું.
(1:23 PM IST)
છેલ્લા 8 દિવસમાં સૌથી લોકપ્રિય 
