મુલનપુર, પંજાબ: ભારતીય મહિલા ક્રિકેટ ટીમે ઓસ્ટ્રેલિયા સામેની બીજી વન-ડે મેચમાં શાનદાર પ્રદર્શન કરીને ૧૦૨ રનથી વિજય મેળવ્યો છે. આ જીત સાથે, ભારતે ત્રણ મેચની સિરીઝમાં ૧-૧ની બરાબરી કરી છે. ભારતની આ જીતનો શ્રેય મુખ્યત્વે સ્મૃતિ મંધાનાની ક્લાસિક સદી અને બોલર્સના શિસ્તબદ્ધ પ્રદર્શનને જાય છે.
 
સ્મૃતિ મંધાના 'પ્લેયર ઓફ ધ મેચ'
પ્લેયર ઓફ ધ મેચ બનેલી સ્મૃતિ મંધાનાએ ૯૧ બોલમાં ૧૧૭ રનની તોફાની ઇનિંગ રમી, જેમાં ૧૪ ચોગ્ગા અને ૪ છગ્ગા સામેલ હતા. આ મેચમાં જીત મળતા મંધાનાએ ખુશી વ્યક્ત કરતા કહ્યું, "ઓસ્ટ્રેલિયા સામેની મારી છેલ્લી બે સદી હારમાં પરિણમી હતી, ખુશ છું કે આજે અમે મેચ જીત્યા." તેણે કહ્યું કે ઓસ્ટ્રેલિયા જેવી ટીમ સામે ૨૮૦-૨૯૦ રન બનાવવા જરૂરી હોય છે.
 
બોલર્સની કમાલ અને ઓસ્ટ્રેલિયાની નબળી બેટિંગ
ભારતે બેટિંગ કરતા ૨૯૨ રનનો મજબૂત સ્કોર બનાવ્યો હતો. શરૂઆતમાં ભારતનો સ્કોર ૩૨૦+ સુધી પહોંચી શકે તેમ હતો, પરંતુ ઓસ્ટ્રેલિયન બોલર્સે સારી રીતે વાપસી કરી હતી. જોકે, ભારતીય બોલર્સે નવી બોલથી જ ઓસ્ટ્રેલિયા પર દબાણ બનાવ્યું. ક્રાંતિ ગૌડ અને રેણુકા સિંહ ઠાકુરે ઓપનરને ઝડપી આઉટ કર્યા અને પાવરપ્લેમાં માત્ર ૨૫ રન આપ્યા.

અંતે, ઓસ્ટ્રેલિયાની ટીમ ૨૯૨ રનના જવાબમાં માત્ર ૧૯૦ રન જ બનાવી શકી. ઓસ્ટ્રેલિયાની છેલ્લી છ વિકેટ માત્ર ૫૬ રનમાં પડી ગઈ. આ જીત ઓસ્ટ્રેલિયા સામે ભારતીય મહિલા ટીમની ઘરેલું મેદાન પર ૨૦૦૭ પછીની પ્રથમ જીત છે. આ ઉપરાંત, આ રનની દ્રષ્ટિએ ઓસ્ટ્રેલિયાની વન-ડે ઇતિહાસમાં સૌથી મોટી હાર છે.