નવી દિલ્હી ૨ સપ્ટેમ્બર, ૨૦૨૫: ઓસ્ટ્રેલિયાના દિગ્ગજ ફાસ્ટ બોલર મિશેલ સ્ટાર્કે T20 આંતરરાષ્ટ્રીય ક્રિકેટમાંથી નિવૃત્તિ જાહેર કરીને ક્રિકેટ જગતને ચોંકાવી દીધું છે. ૩૫ વર્ષીય સ્ટાર્કે હવે પોતાનું સંપૂર્ણ ધ્યાન ટેસ્ટ અને વન-ડે ફોર્મેટ પર કેન્દ્રિત કરવાનો નિર્ણય લીધો છે, જેથી તે આવનારી મોટી ટુર્નામેન્ટ્સ માટે પોતાને ફિટ અને ફ્રેશ રાખી શકે.

સ્ટાર્કેએ ૨૦૧૨માં પાકિસ્તાન સામે T20I ડેબ્યૂ કર્યું હતું અને લગભગ ૧૩ વર્ષ સુધી આ ફોર્મેટમાં ઓસ્ટ્રેલિયાનું પ્રતિનિધિત્વ કર્યું. તેણે ૬૫ મેચમાં ૭૯ વિકેટ લીધી અને ૨૦૨૧ના T20 વર્લ્ડ કપમાં ઓસ્ટ્રેલિયાની જીતમાં તેણે મહત્ત્વની ભૂમિકા ભજવી હતી. તેની છેલ્લી T20I મેચ જૂન ૨૦૨૪માં ભારત સામે હતી.
 
નિવૃત્તિનું કારણ: ટેસ્ટ અને ODI પર ધ્યાન કેન્દ્રિત કરવું
સ્ટાર્ક આ નિર્ણય પાછળનું મુખ્ય કારણ સમજાવતા કહ્યું કે, "ટેસ્ટ ક્રિકેટ હંમેશા મારી પ્રથમ પ્રાથમિકતા રહી છે. મેં ઓસ્ટ્રેલિયા માટે રમેલી દરેક T20 મેચનો ખૂબ આનંદ માણ્યો છે, ખાસ કરીને ૨૦૨૧ના વર્લ્ડ કપની જીત. હવે ભવિષ્યમાં ભારતમાં ટેસ્ટ પ્રવાસ, એશિઝ અને ૨૦૨૭ ODI વર્લ્ડ કપ જેવી મોટી ટુર્નામેન્ટ્સ આવવાની છે. મને લાગે છે કે આ નિર્ણાયક પડકારો માટે મારી જાતને ફ્રેશ અને શ્રેષ્ઠ રાખવાનો આ શ્રેષ્ઠ માર્ગ છે."

ક્રિકેટ ઓસ્ટ્રેલિયાની પસંદગી સમિતિના અધ્યક્ષ જ્યોર્જ બેઇલીએ પણ સ્ટાર્કના આ નિર્ણયનું સમર્થન કર્યું. તેમણે કહ્યું કે, "મિચેલને તેની T20 કારકિર્દી પર ખૂબ ગર્વ હોવો જોઈએ. તે ૨૦૨૧ના વર્લ્ડ કપ વિજેતા ટીમનો એક મહત્ત્વનો ભાગ હતો. જોકે, સારી વાત એ છે કે તે હજુ પણ ટેસ્ટ અને ODI ક્રિકેટ પર ધ્યાન કેન્દ્રિત કરવા અને શક્ય તેટલું રમવા માંગે છે."
 
સ્ટાર્કની T20I કારકિર્દી પર એક નજર
સ્ટાર્ક તેની T20I કારકિર્દીમાં હંમેશા વિરોધી ટીમો માટે મુશ્કેલ બોલર રહ્યો છે. ૬૫ મેચમાં ૭૯ વિકેટ સાથે તે એડમ ઝામ્પા (૧૩૦ વિકેટ) પછી ઓસ્ટ્રેલિયા માટે બીજા ક્રમે સૌથી વધુ વિકેટ લેનાર બોલર છે. તેણે ૨૩.૮૧ની સરેરાશ અને ૭.૭૪ની ઇકોનોમી રેટથી બોલિંગ કરી છે, જે તેની સચોટ અને ઝડપી બોલિંગની ક્ષમતા દર્શાવે છે. જોકે, તેની નિવૃત્તિથી ઓસ્ટ્રેલિયન ટીમને ભવિષ્યમાં T20 ફોર્મેટમાં એક મોટા અનુભવી બોલરની ખોટ જરૂર પડશે.