નવી દિલ્હી : દિલ્હી પ્રીમિયર લીગ (DPL)માં ક્રિકેટના મેદાન પર આજે ભારે ડ્રામા જોવા મળ્યો. પશ્ચિમ દિલ્હી લાયન્સના કેપ્ટન નીતિશ રાણા અને દક્ષિણ દિલ્હીના બોલર દિગ્વેશ રાઠી વચ્ચે એલિમિનેટર મેચ દરમિયાન ઉગ્ર બોલાચાલી થઈ. આ ઘટના બાદ, બંને ખેલાડીઓને મેચ ફીનો મોટો દંડ ફટકારવામાં આવ્યો છે.
 
મેદાન પર શું થયું?
દક્ષિણ દિલ્હી અને પશ્ચિમ દિલ્હી વચ્ચેની એલિમિનેટર મેચ ચાલી રહી હતી. નીતિશ રાણા વિસ્ફોટક બેટિંગ કરી રહ્યો હતો. બોલિંગ કરવા આવેલા દિગ્વેશ રાઠીએ બોલ ફેંક્યો નહિ, અને નીતિશ રાણાએ મોક-સ્વીપ (નકલી શોટ) રમ્યો. રાઠી હસતાં હસતાં પાછો ફર્યો. પરંતુ જ્યારે રાઠી ફરીથી બોલિંગ કરવા આવ્યો, ત્યારે રાણાએ રિવર્સ-સ્વીપ શૉટ ફટકારીને ડીપ પોઈન્ટ પર સિક્સર મારી.

આ સિક્સર બાદ, રાણાએ પોતાનું બેટ ચૂમીને ઉજવણી કરી અને રાઠી તરફ જોઈને કંઈક કહ્યું, જેના પછી બંને વચ્ચે ઉગ્ર બોલાચાલી શરૂ થઈ ગઈ. પરિસ્થિતિ એટલી તંગ બની ગઈ કે અમ્પાયર અને અન્ય ખેલાડીઓને વચ્ચે પડવું પડ્યું.
 
કઠોર કાર્યવાહી અને દંડ
આ ઘટના પછી, મેચ રેફરીએ આક્રમક વર્તન માટે નીતિશ રાણા પર તેની મેચ ફીનો ૫૦% દંડ ફટકાર્યો. બીજી તરફ, દિગ્વેશ રાઠીએ રમતની ભાવના વિરુદ્ધ વર્તન કર્યું હોવાથી, તેના પર મેચ ફીનો ૮૦% દંડ લાદવામાં આવ્યો છે.

આ ઉપરાંત, આચારસંહિતાનું ઉલ્લંઘન કરવા બદલ અન્ય ખેલાડીઓ ક્રિશ યાદવ, સુમિત માથુર અને અમન ભારતીને પણ દંડ ફટકારવામાં આવ્યો છે, જે દર્શાવે છે કે બોર્ડ આ પ્રકારના વર્તનને ગંભીરતાથી લઈ રહ્યું છે.
 
રાણાની વિસ્ફોટક સદીએ જીત અપાવી
મેદાન પર વિવાદ થયા પછી પણ નીતિશ રાણાનું પ્રદર્શન અટક્યું નહિ. તેણે પોતાની આક્રમક બેટિંગ ચાલુ રાખી અને માત્ર ૫૫ બોલમાં ૮ ચોગ્ગા અને ૧૫ છગ્ગાની મદદથી ૧૩૪ રનની અણનમ ઇનિંગ રમી. તેની આ શાનદાર સદીના કારણે પશ્ચિમ દિલ્હીની ટીમે દક્ષિણ દિલ્હીના ૨૦૧ રનના લક્ષ્યાંકને માત્ર ૧૭.૧ ઓવરમાં હાંસલ કરી લીધો અને ૭ વિકેટથી મેચ જીતી લીધી.

ઉલ્લેખનીય છે કે, IPL ૨૦૨૫માં દિગ્વેશ રાઠી પણ તેના 'નોટબુક સેલિબ્રેશન' માટે વિવાદોમાં રહ્યો હતો, જેના કારણે તેને દંડ અને એક મેચનો પ્રતિબંધ પણ સહન કરવો પડ્યો હતો.