તિરુવનંતપુરમ, કેરળ : ક્રિકેટના દિવાના ભારતમાં હવે ફૂટબોલનો જાદુ ચાલવાનો છે. ફૂટબોલ જગતના મહાનતમ ખેલાડીઓ પૈકીના એક લિયોનેલ મેસ્સીની કેપ્ટનશીપ હેઠળની વર્લ્ડ ચેમ્પિયન ટીમ આર્જેન્ટિના આ વર્ષે નવેમ્બર મહિનામાં મૈત્રીપૂર્ણ મેચ રમવા માટે ભારત આવશે. કેરળના રમતગમત મંત્રી વી. અબ્દુરહિમાને પોતાના સોશિયલ મીડિયા દ્વારા આ ઐતિહાસિક સમાચારની પુષ્ટિ કરી છે.

રમતગમત મંત્રીએ જણાવ્યું કે આર્જેન્ટિના ફૂટબોલ એસોસિએશન (AFA) એ એક સત્તાવાર ઇ-મેલ દ્વારા પુષ્ટિ કરી છે કે તેમની ટીમ કેરળમાં મૈત્રીપૂર્ણ મેચ રમવા માટે સંમત થઈ છે. આ સમાચારથી ભારતના ફૂટબોલ પ્રેમીઓમાં, ખાસ કરીને કેરળમાં, આનંદ અને ઉત્સાહનો માહોલ છે. કેરળમાં દક્ષિણ અમેરિકન ફૂટબોલ ટીમો માટે જબરદસ્ત ક્રેઝ છે. ૨૦૨૨ના ફીફા વર્લ્ડ કપમાં આર્જેન્ટિનાની જીત બાદ, ટીમે સોશિયલ મીડિયા પર કેરળના ફૂટબોલ ચાહકોનો ખાસ આભાર પણ માન્યો હતો.
 
કેરળ ફૂટબોલ એસોસિએશન (KFA) અને ઓલ ઇન્ડિયા ફૂટબોલ ફેડરેશન (AIFF) સાથે મળીને મેચના સ્થળની પસંદગી કરી રહ્યા છે. આ મેચ તિરુવનંતપુરમના ગ્રીનફિલ્ડ સ્ટેડિયમમાં યોજાય તેવી સંભાવના છે. આ મેચ ૨૦૨૬ના ફીફા વર્લ્ડ કપ ક્વોલિફાયર પહેલા આર્જેન્ટિનાના તૈયારી કાર્યક્રમનો એક ભાગ હશે.

પર્યટન અધિકારીઓ માને છે કે મેસ્સીના આગમનથી કેરળની આંતરરાષ્ટ્રીય છબીમાં વધારો થશે અને દેશ-વિદેશના ચાહકો અને પ્રવાસીઓ આકર્ષિત થશે. રાજ્ય સરકાર સુરક્ષા, ભીડ વ્યવસ્થાપન અને અન્ય વ્યવસ્થા માટે સંપૂર્ણ સહયોગ આપવા તૈયાર છે.

આ મેચ ભારતમાં ફૂટબોલના વિકાસ માટે એક મહત્વપૂર્ણ સીમાચિહ્ન સાબિત થઈ શકે છે. લિયોનેલ મેસ્સી જેવા દિગ્ગજ ખેલાડીને ભારતીય જમીન પર રમતા જોવું એ દરેક ભારતીય ફૂટબોલ ચાહક માટે એક 'સ્વપ્ન સાકાર' થવા જેવો અનુભવ હશે.