માન્ચેસ્ટર, તા.૨૪

માન્ચેસ્ટરના ઓલ્ડ ટ્રેફોર્ડ ખાતે રમાઈ રહેલી ચોથી ટેસ્ટ મેચમાં ટીમ ઈન્ડિયાએ પ્રથમ ઇનિંગમાં ૩૫૮ રન બનાવ્યા હતા. બીજા દિવસે ભારત તરફથી ઋષભ પંત ઘાયલ હાલતમાં બેટિંગ કરવા ઉતર્યો હતો. ગઈકાલે (બુધવારે) તે ૩૭ રન બનાવીને રિટાયર્ડ હર્ટ થયો હતો. ઋષભ પંત લંગડાતો રહ્યો અને ઈંગ્લેન્ડના બોલરોનો સામનો કરતો રહ્યો. પંતે ૭૫ બોલમાં ૫૪ રનની ઇનિંગ રમી. આ દરમિયાન તેના બેટમાંથી ૩ ચોગ્ગા અને ૨ છગ્ગા નીકળ્યા. પંત ઉપરાંત, સાઈ સુદર્શને ૬૧ અને યશસ્વી જયસ્વાલે ૫૮ રન બનાવ્યા. ઈંગ્લેન્ડ તરફથી કેપ્ટન બેન સ્ટોક્સે ૫ વિકેટ લીધી.

ઋષભ પંતે તૂટેલા અંગૂઠા સાથે અડધી સદી ફટકારીને ઇતિહાસ રચ્યો છે. તે હવે ઇંગ્લેન્ડમાં સૌથી વધુ વખત ૫૦ થી વધુ સ્કોર બનાવનાર ભારતીય વિકેટકીપર બની ગયો છે. આ તેનો ઇંગ્લેન્ડમાં પાંચમો પચાસ થી વધુ સ્કોર હતો. પંતે એમએસ ધોની અને ફારૃક એન્જિનિયરને પાછળ છોડી દીધા છે. ધોની અને ફારૃકે ચાર વખત ૫૦થી વધુ સ્કોર કર્યા હતા.

ટોસ હાર્યા બાદ પ્રથમ બેટિંગ કરવા આવેલી ટીમ ઇન્ડિયાની ચોથી ટેસ્ટમાં સારી શરૃઆત હતી. કેએલ રાહુલ અને યશસ્વી જયસ્વાલે પ્રથમ વિકેટ માટે ૯૪ રનની ભાગીદારી કરી હતી. કેએલ રાહુલ ૯૮ બોલમાં૪  ચોગ્ગાની મદદથી ૪૬ રન બનાવીને આઉટ થયો હતો. ત્યારબાદ ત્રીજા નંબરે આવેલા સાઈ સુદર્શને પણ અડધી સદી ફટકારી હતી અને યશસ્વી જયસ્વાલે પણ અડધી સદી ફટકારી હતી.

જયસ્વાલે ૧૦૭ બોલમાં ૫૮ રનની ઇનિંગ રમી હતી. તેના બેટમાંથી ૧૦ ચોગ્ગા અને એક છગ્ગો નીકળ્યો હતો. સાઈ સુદર્શને ૧૫૧ બોલમાં ૭ ચોગ્ગાની મદદથી ૬૧ રન બનાવ્યા. ટેસ્ટ ક્રિકેટમાં આ તેમની પહેલી અડધી સદી હતી. બીજી તરફ, કેપ્ટન શુભમન ગિલનું બેટ શાંત રહ્યું. તે ફક્ત ૧૨ રન જ બનાવી શક્યો.

પહેલા દિવસે ૩૭ રન પર ઘાયલ થયેલા ઋષભ પંતે ૭૫ બોલમાં ૫૪ રનની ઇનિંગ રમી. રવિન્દ્ર જાડેજાએ ૨૦ રન બનાવ્યા. શાર્દુલ ઠાકુરે ૪૧ અને વોશિંગ્ટન સુંદરે ૨૭ રનની મહત્વપૂર્ણ ઇનિંગ રમી. અંશુલ કંબોજ ૦ અને જસપ્રીત બુમરાહ ચાર રન બનાવીને આઉટ થયો. ઇંગ્લેન્ડ તરફથી કેપ્ટન બેન સ્ટોક્સે ૭૨ રનમાં પાંચ વિકેટ લીધી. તે જ સમયે, જોફ્રા આર્ચરે ૭૩ રનમાં ૩ ભારતીય બેટ્સમેનોને આઉટ કર્યા હતા. આ ઉપરાંત, લિયામ ડોસન અને ક્રિસ વોક્સે એક-એક વિકેટ લીધી.