હેડિંગ્લી ખાતે રમાઈ રહેલી પ્રથમ ટેસ્ટ મેચમાં ઘણા બધા ફેરફારો જોવા મળી રહ્યા છે. ક્યારેક ઈંગ્લેન્ડ તો ક્યારેક ટીમ ઈન્ડિયા મેચમાં આગળ જોવા મળી રહી છે. મેચના ત્રીજા દિવસે પહેલા સત્રમાં સમાચાર લખાય ત્યાં સુધી ટીમ ઈન્ડિયાએ 2 વિકેટ લીધી છે. આ દરમિયાન, ભારતીય ટીમના ઉપ-કપ્તાન ઋષભ પંત અને કેપ્ટન શુભમન ગિલે અમ્પાયર ક્રિસ ગેફની પાસેથી એક માંગણી કરી હતી, જેને તેમણે ફગાવી દીધી હતી. ત્યારબાદ, લાઈવ મેચમાં ઋષભ પંતનું ગુસ્સે ભરેલું સ્વરૂપ જોવા મળ્યું.
હેડિંગ્લી ટેસ્ટ મેચમાં એક સમયે, ઇંગ્લેન્ડની ટીમ ઝડપથી રન બનાવી રહી હતી. હેરી બ્રુકે દરેક ભારતીય બોલર સામે આક્રમક વલણ અપનાવ્યું હતું, જ્યારે કેપ્ટન બેન સ્ટોક્સ પણ પાછળ નહોતો. તે સમયે, વિકેટકીપર બેટ્સમેન ઋષભ પંત અને કેપ્ટન ગિલે અમ્પાયર ક્રિસ ગેફનીને બોલ બદલવા કહ્યું. ગેફની માનતા હતા કે બોલ હજુ એટલો ખરાબ નથી કે તેને બદલવો પડે. આવી સ્થિતિમાં, ઉપ-કપ્તાન રિષભ પંત ગુસ્સે થઈ ગયો અને બોલ અમ્પાયરની સામે ફેંકી દીધો. આ જોઈને બધા દર્શકો અવાજ કરવા લાગ્યા. જોકે, આ પછી પંતે પોતાનો ગુસ્સો શાંત કર્યો.
સમાચાર લખાય છે ત્યારે ઈંગ્લિશ ટીમે 6 વિકેટ ગુમાવ્યા બાદ સ્કોર 300 રનને પાર કરી ગયો છે. રમતના ત્રીજા દિવસે પ્રસિદ્ધ કૃષ્ણાએ પહેલા ઓલી પોપને 106 રનના સ્કોર પર પેવેલિયન મોકલ્યો. ત્યારબાદ મોહમ્મદ સિરાજે 20 રનના સ્કોર પર બેન સ્ટોક્સને પેવેલિયન મોકલ્યો. ભારતીય ટીમ 1 વિકેટ લેતાની સાથે જ બોલરો બેટિંગ કરવા આવશે. આવી સ્થિતિમાં, ઈંગ્લિશ ટીમને જલ્દી ઓલઆઉટ કરવું પડશે.