<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 18th June 2025

ભારત સામેની પહેલી ટેસ્ટ માટે ઈંગ્લેન્ડની પ્લેઈંગ ઈલેવનની જાહેરાત

ઈંગ્લેન્ડે જેકબ બેથેલ, જેમી ઓવરટન અને સેમ કૂકને પ્લેઈંગ ઈલેવનમાંથી બાકાત રાખ્યા

ભારત અને ઈંગ્લેન્ડ વચ્ચે પાંચ મેચની ટેસ્ટ શ્રેણીની પહેલી મેચ લીડ્સમાં રમાશે અને આ મેચ માટે યજમાન ઈંગ્લેન્ડની ટીમે તેની પ્લેઈંગ ઈલેવનની જાહેરાત કરી છે. પ્લેઈંગ ઈલેવનમાંથી ત્રણ મહત્વપૂર્ણ ખેલાડીઓને બહાર કરવામાં આવ્યા છે. ઈંગ્લેન્ડની પ્લેઈંગ ઈલેવનમાં ત્રણ ફાસ્ટ બોલરોનો સમાવેશ કરવામાં આવ્યો છે. જ્યારે એક સ્પેશિયાલિસ્ટ સ્પિનરને સ્થાન મળ્યું છે. ઈંગ્લેન્ડે જેકબ બેથેલ, જેમી ઓવરટન અને સેમ કૂકને પ્લેઈંગ ઈલેવનમાંથી બાકાત રાખ્યા છે.

     એવું કહેવામાં આવી રહ્યું હતું કે લીડ્સ ટેસ્ટમાં ઈંગ્લેન્ડની ટીમે ગ્રીન પિચને બદલે સારી બેટિંગ પિચની માંગ કરી છે. પરંતુ ઈંગ્લેન્ડની પ્લેઈંગ ઈલેવનને જોતા એવું લાગતું નથી. કારણ કે ઈંગ્લેન્ડે તેની ટીમમાં ચાર સ્પેશિયાલિસ્ટ બોલરો રાખ્યા છે, જેમાંથી એક સ્પિનર શોએબ બશીર છે 

    ઈંગ્લેન્ડ એક સ્પેશિયાલિસ્ટ સ્પિનર સાથે મેદાનમાં ઉતર્યું છે અને ત્રણ ફાસ્ટ બોલરો ઉપરાંત, તેની પાસે કેપ્ટન બેન સ્ટોક્સ છે જે પોતે એક મીડિયમ પેસર છે. મતલબ કે ઈંગ્લેન્ડ ચાર ફાસ્ટ બોલરો સાથે મેદાનમાં ઉતરશે અને આ એક સંકેત છે કે લીડ્સની પિચ પર ફાસ્ટ બોલરોને મદદ મળી શકે છે. 

ઈંગ્લેન્ડના બોલિંગ યુનિટમાં અનુભવનો અભાવ છે. એન્ડરસન અને બ્રોડ બંને ભારત સામેની છેલ્લી ટેસ્ટ શ્રેણીમાં હતા પરંતુ હવે બંને નિવૃત્ત થઈ ગયા છે અને હવે ઈંગ્લેન્ડની ટીમ બ્રાયડન કાર્સ, જોશ ટોંગ, શોએબ બશીર પર નિર્ભર છે.

 

ઈંગ્લેન્ડની ટીમમાં ક્રિસ વોક્સ એકમાત્ર અનુભવી બોલર છે જે ટીમ ઈન્ડિયાને પરેશાન કરી રહ્યો છે અને આ વખતે તે ઈંગ્લેન્ડનો સૌથી મોટો સ્ટ્રાઈક બોલર હશે. તેથી ભારતીય બેટ્સમેન આનો ફાયદો ઉઠાવી શકે છે. હવે જોવાનું એ રહે છે કે લીડ્સ ટેસ્ટમાં કોનો હાથ ઉપર છે.

ઈંગ્લેન્ડની પ્લેઈંગ ઈલેવન

જેક ક્રોલી, બેન ડકેટ, ઓલી પોપ, જો રૂટ, હેરી બ્રુક, બેન સ્ટોક્સ (કેપ્ટન), જેમી સ્મિથ, ક્રિસ વોક્સ, બ્રાયડન કાર્સ, જોશ ટંગ અને શોએબ બશીર.

(7:59 PM IST)