નવી દિલ્હી, ૦૯ જૂન ૨૦૨૫: ભારતીય ક્રિકેટ કંટ્રોલ બોર્ડ (BCCI) એ સોમવારે એક મહત્વપૂર્ણ જાહેરાત કરતા, આગામી ઓક્ટોબર-નવેમ્બરમાં ભારતમાં રમાનારી કેટલીક આંતરરાષ્ટ્રીય ક્રિકેટ મેચોના સ્થળોમાં ફેરફાર કર્યા છે. હાલ ભારતીય ટીમ ઇંગ્લેન્ડમાં પાંચ મેચની ટેસ્ટ શ્રેણીની તૈયારી કરી રહી છે, તે દરમિયાન આ સ્થાન બદલવાની ઘોષણા કરવામાં આવી છે. આ ફેરફારોમાં વેસ્ટ ઇન્ડિઝ અને દક્ષિણ આફ્રિકા સામેની પુરુષ ટીમની મેચો તેમજ ભારતીય મહિલા ટીમની મેચોનો સમાવેશ થાય છે.
પુરુષ ટીમના કાર્યક્રમમાં ફેરફાર:
ભારતીય સિનિયર પુરુષ ક્રિકેટ ટીમ ઘરઆંગણે વેસ્ટ ઇન્ડિઝ અને દક્ષિણ આફ્રિકા સામે ટેસ્ટ, વનડે અને ટી૨૦ શ્રેણી રમવાની છે. વેસ્ટ ઇન્ડિઝ સામેની ટેસ્ટ શ્રેણીનો પ્રારંભ ૨ ઓક્ટોબરથી અમદાવાદમાં પ્રથમ ટેસ્ટ સાથે થશે. જોકે, આ શ્રેણીની બીજી ટેસ્ટ મેચના સ્થળમાં ફેરફાર કરવામાં આવ્યો છે. વેસ્ટ ઇન્ડિઝ સામેની બીજી ટેસ્ટ મેચ ૧૦ થી ૧૪ ઓક્ટોબર દરમિયાન કોલકાતાના ઈડન ગાર્ડન્સ સ્ટેડિયમમાં રમાવાની હતી, પરંતુ BCCI એ તેનું સ્થળ બદલીને હવે દિલ્હીના અરુણ જેટલી સ્ટેડિયમમાં રાખ્યું છે. મેચની તારીખોમાં કોઈ ફેરફાર કરવામાં આવ્યો નથી.
આ ઉપરાંત, ભારત અને દક્ષિણ આફ્રિકા વચ્ચે રમાનારી ૨ મેચની શ્રેણીની પ્રથમ ટેસ્ટ મેચના સ્થળમાં પણ ફેરફાર કરાયો છે. આ મેચ ૧૪ નવેમ્બરથી શરૂ થશે. અગાઉ આ મેચ દિલ્હીમાં યોજાવાની હતી, પરંતુ હવે BCCI એ તેનું સ્થળ બદલીને કોલકાતાના ઇડન ગાર્ડન્સ સ્ટેડિયમમાં રાખ્યું છે. દક્ષિણ આફ્રિકાની ટીમ ભારતના પ્રવાસ દરમિયાન ૨ ટેસ્ટ બાદ ૩ વનડે અને ૫ ટી૨૦ મેચ પણ રમશે.
ભારતીય મહિલા ટીમની શ્રેણીના સ્થળોમાં ફેરફાર:
BCCI એ એક નિવેદન જારી કરીને જણાવ્યું હતું કે, ચેન્નઈના એમ.એ. ચિદમ્બરમ સ્ટેડિયમમાં આઉટફિલ્ડ અને પીચના નવીનીકરણના કામને કારણે ભારત અને ઓસ્ટ્રેલિયા મહિલા ટીમ વચ્ચેની વનડે શ્રેણી ચેન્નઈથી ખસેડવામાં આવી છે. હવે આ શ્રેણીની પ્રથમ બે વનડે મેચ ન્યૂ ચંદીગઢના ન્યૂ પીસીએ સ્ટેડિયમમાં રમાશે, જ્યારે છેલ્લી વનડે નવી દિલ્હીના અરુણ જેટલી સ્ટેડિયમમાં રમાશે.
દક્ષિણ આફ્રિકા 'A' ટીમનો ભારત પ્રવાસ:
દક્ષિણ આફ્રિકાની પુરુષ 'A' ટીમ પણ ૩૦ ઓક્ટોબરથી ભારત 'A' ટીમ સામે ૨ મલ્ટી-ડે અને ૩ વનડે મેચ રમશે. ૨ મલ્ટી-ડે મેચ બેંગલુરુમાં BCCI સેન્ટર ઓફ એક્સેલન્સ ખાતે રમાશે. જોકે, ૩ વનડે મેચનું સ્થળ એમ. ચિન્નાસ્વામી સ્ટેડિયમથી રાજકોટના સૌરાષ્ટ્ર ક્રિકેટ એસોસિએશન સ્ટેડિયમમાં ખસેડવામાં આવ્યું છે.
આ ફેરફારો લોજિસ્ટિક્સ અને સ્ટેડિયમની ઉપલબ્ધતાને ધ્યાનમાં રાખીને કરવામાં આવ્યા હોવાનું BCCI દ્વારા જણાવાયું છે.