કોલકાતા નાઈટ રાઈડર્સના કેપ્ટન અજિંક્ય રહાણે 29 એપ્રિલે રમાયેલી દિલ્હી કેપિટલ્સ સામેની મેચમાં ઈજાગ્રસ્ત થયો હતો. રહાણેને મેચની બીજી ઇનિંગની 12મી ઓવર દરમિયાન આ ઈજા થઈ હતી. અજિંક્ય રહાણે શોર્ટ કવર પર ફિલ્ડિંગ કરી રહ્યો હતો ત્યારે ફાફ ડુ પ્લેસિસે શોટ માર્યો અને શોટ પકડતી વખતે રહાણેના હાથમાં ઈજા થઈ હતી. ત્યારબાદ તે બાકીની મેચમાં ફિલ્ડિંગ કરતો જોવા મળ્યો ન હતો. KKR એ મેચ 14 રનથી જીતી લીધી હતી પરંતુ બધાના મનમાં પ્રશ્ન એ હતો કે રહાણેની ઈજા કેટલી ગંભીર છે અને તે આગામી મેચમાં રમી શકશે કે નહીં. આ અંગે KKR ખેલાડી અનુકુલ રોયે મેચ પછી એક મોટી અપડેટ આપી છે.

રહાણે મેદાન છોડ્યા પછી સુનીલ નારાયણે સ્ટેન્ડ-ઇન કેપ્ટનની ભૂમિકા ભજવી અને ટીમને જીત તરફ દોરી. આ જીત સાથે KKR ની પ્લેઓફની આશા હજુ પણ જીવંત છે. મેચ પછીની પ્રેસ કોન્ફરન્સમાં અનુકુલ રોયે કહ્યું કે KKRના કેપ્ટન અજિંક્ય રહાણેને સ્વસ્થ થવામાં થોડા દિવસ લાગશે. તેમણે જણાવ્યું કે રહાણેની ઈજા બહુ ગંભીર નથી. તે થોડા દિવસોમાં ઠીક થઈ જશે.

અનુકુલે કહ્યું કે રહાણેની ઈજા બહુ ગંભીર નથી લાગતી. તેમને સ્વસ્થ થવામાં બે કે ત્રણ દિવસ લાગી શકે છે. તેમની ઈજા કેટલી ગંભીર છે તે તો ફક્ત ડોક્ટરો જ કહી શકશે, પરંતુ તેઓ હવે ઠીક છે. રહાણેના હાથ પર ટાંકા આવ્યા છે. KKR ફિઝિયોથેરાપિસ્ટ પ્રશાંત પંચાડા તેમની ઈજાની તપાસ કરશે. KKRનો આગામી મુકાબલો 4 મેના રોજ રાજસ્થાન રોયલ્સ સામે થશે. હવે જોવાનું એ છે કે KKRનો કેપ્ટન તે મેચ માટે ફિટ છે કે નહીં.

કોલકાતાની વાત કરીએ તો ટીમ 10 મેચમાં 9 પોઈન્ટ સાથે IPL પોઈન્ટ ટેબલમાં 7મા સ્થાને છે. પ્લેઓફમાં પહોંચવા માટે KKR ને બાકીની ચાર મેચોમાંથી ઓછામાં ઓછી ત્રણ જીતવી પડશે. બાકીની મેચ જીતવા માટે તેમને મેદાન પર જોરદાર પ્રદર્શન કરવું પડશે. આવી સ્થિતિમાં જો રહાણે ઈજાને કારણે કેટલીક મેચોમાંથી બહાર રહે છે, તો તે ટીમ માટે મોટો ફટકો ગણી શકાય.