મુંબઈ :રોયલ ચેલેન્જર્સ બેંગ્લોર સામે મુંબઈ ઈન્ડિયન્સના કેપ્ટન હાર્દિક પંડ્યાએ પોતાના કરિયરમાં એક મોટો માઈલસ્ટોન હાંસલ કર્યો. પંડ્યાએ વાનખેડે સ્ટેડિયમમાં એક ખાસ બેવડી સદી ફટકારી છે. તેણે આ બેવડી સદી બેટથી નહીં પણ બોલથી ફટકારી.

પંડ્યાએ ટી20માં પોતાની 200 વિકેટ પૂર્ણ કરી છે. તેણે RCB સામે આ સિદ્ધિ હાંસલ કરી પણ ઘણા બધા રન આપ્યા. પંડ્યાએ ચાર ઓવરમાં 45 રન આપ્યા અને બે વિકેટ ઝડપી.

પંડ્યાએ લખનઉ સુપરજાયન્ટ્સ સામે રમાયેલી છેલ્લી મેચમાં પાંચ વિકેટ લીધી હતી. આ મેચમાં તેણે પહેલા વિરાટ કોહલીને આઉટ કર્યો જે શાનદાર બેટિંગ કરી રહ્યો હતો. પંડ્યાએ 15મી ઓવરના પહેલા બોલ પર કોહલીને આઉટ કર્યો. આ જ ઓવરના ત્રીજા બોલ પર પંડ્યાએ RCBના બીજા એક શાનદાર બેટ્સમેનની વિકેટ લીધી. તેણે લિયામ લિવિંગસ્ટોનને જસપ્રીત બુમરાહના હાથે કેચ આઉટ કરાવ્યો. લિવિંગસ્ટોન ખાતું ખોલાવ્યા વિના બે બોલમાં આઉટ થઈ ગયો. આ વિકેટ સાથે પંડ્યાએ પોતાની 200 વિકેટ પૂર્ણ કરી. તેણે 291 ટી20 મેચોમાં આ કર્યું.

બુમરાહની વાપસી પછી પણ પંડ્યા અને તેની ટીમ આરસીબીને મોટો સ્કોર કરતા રોકી શક્યા નહીં. પ્રથમ બેટિંગ કરતા RCBએ 5 વિકેટ ગુમાવીને 221 રન બનાવ્યા. વિરાટ કોહલીએ 42 બોલમાં 8 ચોગ્ગા અને 2 છગ્ગાની મદદથી 67 રન બનાવ્યા. દેવદત્ત પડિક્કલે 22 બોલમાં 37 રનની ઇનિંગ રમી જેમાં તેણે બે ચોગ્ગા અને ત્રણ છગ્ગા ફટકાર્યા.

આરસીબીના કેપ્ટન રજત પાટીદારે 32 બોલમાં પાંચ ચોગ્ગા અને ચાર છગ્ગાની મદદથી 64 રનની ઈનિંગ રમી. જીતેશ શર્માએ આખરે 19 બોલમાં બે ચોગ્ગા અને ચાર છગ્ગાની મદદથી અણનમ 40 રન બનાવ્યા.