ભારતના દિગ્ગજ બેટ્સમેન રોહિત શર્માએ વધુ એક ઐતિહાસિક સિદ્ધિ હાંસલ કરી છે. રોહિતે 2013 માં નિયમિત ઓપનર તરીકે રમવાનું શરૂ કર્યું, ત્યારથી તેણે આંતરરાષ્ટ્રીય ક્રિકેટમાં એક પછી એક ઘણા મોટા રેકોર્ડ બનાવ્યા છે. રોહિત શર્માએ ચેમ્પિયન્સ ટ્રોફી 2025માં પાકિસ્તાન સામેની મેચમાં પણ શાનદાર સિદ્ધિ મેળવી હતી. આ મેચમાં તેણે ખાતું ખોલતાની સાથે જ એક ખાસ યાદીમાં દિગ્ગજ ખેલાડી સચિન તેંડુલકરને પાછળ છોડી દીધો હતો.

  પાકિસ્તાન સામેની આ મેચમાં રોહિત શર્માએ ખાતું ખોલતાની સાથે જ ODIમાં ઓપનર તરીકે 9000 રન પૂરા કર્યા હતા. તેણે માત્ર 181 ઈનિંગ્સમાં ODI ક્રિકેટમાં 9000 રનનો આંકડો પાર કર્યો, જે સૌથી ઝડપી સમયમાં આ આંકડો હાંસલ કરવાનો એક નવો વિશ્વ રેકોર્ડ છે. આ પહેલા આ રેકોર્ડ ક્રિકેટના ભગવાન સચિન તેંડુલકરના નામે હતો, જેમણે 9000 રન પૂરા કરવા માટે 197 ઈનિંગ્સ લીધી હતી

સચિન ઉપરાંત રોહિત શર્માએ સૌરવ ગાંગુલી, ક્રિસ ગેલ, એડમ ગિલક્રિસ્ટ અને સનથ જયસૂર્યા જેવા દિગ્ગજ ઓપનરોને પણ પાછળ છોડી દીધા છે. ODIમાં ઓપનર તરીકે 9000 રન પૂરા કરવા માટે સૌરવ ગાંગુલીએ 231 ઈનિંગ્સ, ક્રિસ ગેલે 246 ઈનિંગ્સ, એડમ ગિલક્રિસ્ટે 253 ઈનિંગ્સ અને સનથ જયસૂર્યાએ 268 ઈનિંગ્સ રમી હતી.

  રોહિત શર્માનો આ રેકોર્ડ તોડવો ખાસ મહત્વપૂર્ણ છે કારણ કે તેણે આ સિદ્ધિ એવા સમયે મેળવી છે જ્યારે ODI ક્રિકેટમાં રન બનાવવાનું દબાણ ઘણું વધી ગયું છે.

આ મેચમાં રોહિત શર્મા મોટી ઈનિંગ રમવામાં નિષ્ફળ ગયો. તેણે 15 બોલનો સામનો કર્યો અને 133.33ના સ્ટ્રાઈક રેટથી 20 રન બનાવ્યા. આ દરમિયાન તેના બેટમાંથી 3 ચોગ્ગા અને 1 છગ્ગો જોવા મળ્યો. પરંતુ તે આ શરૂઆતનો વધુ ફાયદો ઉઠાવી શક્યો નહીં અને શાહીન આફ્રિદીનો શિકાર બન્યો. શાહીન આફ્રિદીએ તેને ક્લીન બોલ્ડ કર્યો હતો