સ્મૃતિ મંધાનાએ ફરી એકવાર શાનદાર ઈનિંગ રમી છે. ટીમ ઈન્ડિયાના કેપ્ટને આયર્લેન્ડ સામે તોફાની સદી ફટકારી હતી. 

મંધાનાએ માત્ર 70 બોલમાં સદી ફટકારી હતી. મંધાના ભારત માટે સૌથી ઝડપી ODI સદી ફટકારનારી ખેલાડી બની ગઈ છે. મંધાનાએ હરમનપ્રીતનો રેકોર્ડ તોડ્યો જેણે દક્ષિણ આફ્રિકા સામે 87 બોલમાં સદી ફટકારી હતી. 

આ સદી મંધાના માટે પણ ખાસ છે કારણ કે આ તેની ODI ક્રિકેટમાં 10મી સદી છે. આ સિદ્ધિ મેળવનારી તે વિશ્વની ચોથી અને ભારતની પ્રથમ ખેલાડી છે. વર્ષ 2025માં મંધાનાએ પહેલીવાર સદીનો આંકડો સ્પર્શ કર્યો છે. 

સ્મૃતિ મંધાનાએ આયર્લેન્ડ સામે ક્રીઝ પર આવતાની સાથે જ તોફાની બેટિંગ કરી હતી. આ ખેલાડીએ પાવરપ્લેમાં પ્રતિકા રાવલ સાથે 90 રન જોડ્યા હતા. આ બંને ખેલાડીઓએ માત્ર 77 બોલમાં સદીની ભાગીદારી કરી હતી. મંધાનાએ 39 બોલમાં 2 છગ્ગા અને 5 ચોગ્ગા ફટકારીને પોતાની અડધી સદી પૂરી કરી હતી. 

મંધાના અહીં જ ન અટકી અને તેણે પોતાની ઈનિંગને વધુ તીવ્ર બનાવી અને આગામી 31 બોલમાં સદી ફટકારી. મંધાનાએ તેની સદીમાં 4 છગ્ગા અને 9 ચોગ્ગા ફટકાર્યા હતા. તેનો સ્ટ્રાઈક રેટ 140થી વધુ હતો. 

સ્મૃતિ મંધાનાએ આયર્લેન્ડ સામેની ત્રીજી વનડેમાં સદી ફટકારીને વધુ એક વર્લ્ડ રેકોર્ડ બનાવ્યો છે. મંધાના ODIમાં 10 સદી ફટકારનાર વિશ્વની પ્રથમ ડાબોડી મહિલા બેટ્સમેન છે. મંધાના પહેલા મેગ લેનિંગ, સુઝી બેટ્સ અને ટેમી બ્યુમોન્ટે ODIમાં 10થી વધુ સદી ફટકારી છે અને તે બધી જમણા હાથની બેટ્સમેન છે 

મંધાનાનું ફોર્મ છેલ્લા ઘણા સમયથી શાનદાર છે. આ ખેલાડીએ છેલ્લી 10 આંતરરાષ્ટ્રીય મેચોમાં 2 સદી અને 6 અડધી સદી ફટકારી છે. તે માત્ર એક જ ઈનિંગમાં સિંગલ ડિજિટના સ્કોર પર આઉટ થઈ ગઈ છે. 

સ્પષ્ટ છે કે જ્યાં સુધી મંધાનાનું ફોર્મ આવું જ રહેશે ત્યાં સુધી તે ઘણા રેકોર્ડ તોડવાની છે. જો કે મંધાના પાસે બેવડી સદી ફટકારવાની તક હતી પરંતુ તે 80 બોલમાં 135 રન બનાવીને આઉટ થઈ ગઈ હતી.