નવી દિલ્હી: ઓસ્ટ્રેલિયાની પસંદગી સમિતિના અધ્યક્ષ જ્યોર્જ બેઇલીએ પેટ કમિન્સની ફિટનેસ અંગે અપડેટ આપ્યું છે. આગામી ICC ચેમ્પિયન્સ ટ્રોફીમાં પેટ કમિન્સની ભાગીદારી શંકાસ્પદ છે. કમિન્સે તાજેતરમાં પૂર્ણ થયેલી બોર્ડર-ગાવસ્કર ટ્રોફીની પાંચેય ટેસ્ટ રમી હતી પરંતુ ઉનાળા દરમિયાન તેને પગની ઘૂંટીમાં ઈજા થઈ હતી. હવે તે આ ઈજા માટે સ્કેન કરાવશે. કમિન્સને શ્રીલંકા પ્રવાસ માટે ટીમમાં સામેલ કરવામાં આવ્યો નથી કારણ કે તે પિતૃત્વ રજા પર છે અને તેના બીજા બાળકના જન્મની રાહ જોઈ રહ્યો છે. જોકે, ૧૯ ફેબ્રુઆરીથી શરૂ થનારી ચેમ્પિયન્સ ટ્રોફી પહેલા ઓસ્ટ્રેલિયન ટીમ માટે તેની ફિટનેસ ચિંતાનો વિષય છે. બેઇલીએ કહ્યું, "પેટ હાલમાં પિતૃત્વ રજા પર છે. તેમને પગની ઘૂંટીમાં નાની ઈજા છે. આવતા અઠવાડિયે તેમનું સ્કેન થશે, જેના પછી અમને તેમની સ્થિતિનો સ્પષ્ટ ખ્યાલ આવશે." જ્યારે કમિન્સ ચેમ્પિયન્સ ટ્રોફીમાં રમી શકશે કે કેમ તે પૂછવામાં આવ્યું ત્યારે તેમણે જવાબ આપ્યો, "અત્યારે કંઈ કહી શકાય નહીં. સ્કેન પરિણામો અને તેની પ્રગતિ જોયા પછી જ નિર્ણય લેવામાં આવશે."