મુંબઈ: ભારતીય બેડમિન્ટન ખેલાડી કિરણ જ્યોર્જે કોરિયા માસ્ટર્સમાં તેની પ્રભાવશાળી જીતનો સિલસિલો જારી રાખતા જાપાનના તાકુમા ઓબાયાશીને હરાવીને મેન્સ સિંગલ્સની સેમિફાઇનલમાં પ્રવેશ કર્યો.શુક્રવારે રમાયેલી ક્વાર્ટર ફાઈનલ મેચમાં ભારતીય ખેલાડીએ ઓબાયાશીને માત્ર 39 મિનિટમાં સીધા સેટમાં 21-14, 21-16થી હરાવ્યો હતો. ઓબાયાશી સામેની તેની ચોથી મેચમાં પણ જ્યોર્જે તેનો અજેય રેકોર્ડ જાળવી રાખ્યો હતો.પ્રથમ ગેમમાં, 24 વર્ષીય કિરણે 5-1ની લીડ લીધી હતી અને મધ્ય-ગેમના વિરામમાં તેને સાત પોઈન્ટ સુધી લંબાવી હતી. તેઓએ પ્રથમ ગેમ 21-14થી જીતી હતી.બીજી ગેમમાં વર્લ્ડ નંબર 44 જ્યોર્જ જોરદાર રીતે રમ્યો હતો. જાપાની ખેલાડીના પ્રારંભિક સંઘર્ષ છતાં, કિરણે 11-8ની લીડ લીધી અને તેને જાળવી રાખી મેચ 21-16થી જીતી લીધી.હવે BWF સુપર 300 બેડમિન્ટન ટૂર્નામેન્ટમાં એકમાત્ર ભારતીય ખેલાડી જ્યોર્જનો શનિવારે સેમિફાઇનલમાં નંબર વન ક્રમાંકિત થાઇલેન્ડના કુનલાવત વિટિદસર્ન સામે થશે.આ પહેલા કિરણ જ્યોર્જે ચાઈનીઝ તાઈપેઈના ત્રીજા ક્રમાંકિત ચી યુ જેનને 21-17, 19-21, 21-17થી હરાવીને ક્વાર્ટર ફાઇનલમાં પ્રવેશ કર્યો હતો.