નવી દિલ્હી તા.૬ :  ન્યૂઝીલેન્ડના હાથે ભારતની ટેસ્ટ શ્રેણીની હાર બાદ ICCએ તાજેતરની રેન્કિંગ જાહેર કરી છે. વિકેટકીપર બેટ્સમેન રિષભ પંતને ICC ટેસ્ટ રેન્કિંગમાં ફાયદો થયો છે, જેણે ન્યૂઝીલેન્ડ સામેની ત્રીજી ટેસ્ટમાં 60 રનની ઇનિંગ રમી હતી.

પંત ઉપરાંત રવિન્દ્ર જાડેજા અને ડેરીલ મિશેલને પણ ફાયદો થયો છે. તે જ સમયે, ટીમ ઈન્ડિયાના સ્ટાર બેટ્સમેન વિરાટ કોહલીને નુકસાન થયું છે. કિંગ કોહલી ICC ટેસ્ટ બેટ્સમેન રેન્કિંગના ટોપ-20માંથી બહાર થઈ ગયો છે.

હાલમાં જ ન્યુઝીલેન્ડ સામે રમાયેલી ત્રીજી ટેસ્ટ મેચમાં ઋષભ પંતે ભારત માટે બંને દાવમાં 60 અને 64 રન બનાવ્યા હતા. આ પ્રદર્શન બાદ પંતને ICC તરફથી પુરસ્કાર મળ્યો હતો. પંતે તાજેતરની ICC રેન્કિંગમાં પાંચ સ્થાનની છલાંગ લગાવી છે અને હવે તે વિશ્વના છઠ્ઠા ક્રમના ટેસ્ટ બેટ્સમેન તરીકે સ્થાન પામ્યો છે.

ભારતીય ટીમનો ઓપનિંગ બેટ્સમેન યશસ્વી જયસ્વાલ ICC ટેસ્ટ બેટિંગ રેન્કિંગમાં ચોથા સ્થાને સરકી ગયો છે. મુંબઈ ટેસ્ટમાં તેણે બેટથી નિરાશાજનક પ્રદર્શન કર્યું હતું, જે બાદ તેણે એક સ્થાન ગુમાવ્યું હતું, આ સિવાય શુભમન ગીલે પણ બેટ્સમેનોની રેન્કિંગમાં સુધારો કર્યો છે

શુભમન ગિલ ICC ટેસ્ટ રેન્કિંગમાં છલાંગ લગાવ્યો છે, જ્યારે કોહલી ટોપ-20માંથી બહાર છે

ગિલે મુંબઈ ટેસ્ટની પ્રથમ ઈનિંગમાં 90 રન બનાવ્યા હતા, ત્યારબાદ તે ICC રેન્કિંગમાં ચાર સ્થાનની છલાંગ લગાવીને વિશ્વનો નંબર 16 બેટ્સમેન બન્યો હતો. જો કે ન્યૂઝીલેન્ડ સામે વિરાટ કોહલીનું બેટ શાંત રહ્યું હતું. આ નબળા પ્રદર્શનને કારણે વિરાટ કોહલી ટોપ-20માંથી બહાર થઈ ગયો છે. 2024માં અત્યાર સુધી માત્ર બે અડધી સદી ફટકારનાર કોહલીને 8 સ્થાનનું નુકસાન થયું છે અને તે હવે 22માં નંબર પર છે. તેના 655 રેટિંગ પોઈન્ટ છે.

ભારતીય કેપ્ટન રોહિત શર્મા પણ બે સ્થાનના નુકસાન સાથે 26માં સ્થાને છે. ન્યુઝીલેન્ડ સામે રમાયેલી ટેસ્ટ શ્રેણીમાં પણ રોહિતનું બેટ શાંત રહ્યું હતું. તે પણ રન બનાવવા માટે તડપતો જણાતો હતો.

જો આઈસીસી ટેસ્ટ બોલર્સ રેન્કિંગની વાત કરીએ તો રવિન્દ્ર જાડેજાએ ન્યૂઝીલેન્ડ સામેની ત્રીજી ટેસ્ટમાં બંને ઈનિંગ્સમાં પાંચ વિકેટ લઈને બે સ્થાનની છલાંગ લગાવી છે અને વિશ્વના છઠ્ઠા ટેસ્ટ બોલર તરીકે સ્થાન મેળવ્યું છે. તેના હવે 802 રેટિંગ પોઈન્ટ છે. ભારતનો સર્વોચ્ચ ક્રમાંકિત ટેસ્ટ બોલર જસપ્રીત બુમરાહ છે, જે 838 રેટિંગ પોઈન્ટ સાથે ત્રીજા ક્રમે છે. રવિચંદ્રન અશ્વિન એક સ્થાન ગુમાવીને હવે પાંચમા નંબરે છે.

સાઉથ આફ્રિકાના કાગિસો રબાડાએ ગયા અઠવાડિયે જસપ્રિત બુમરાહને પછાડી ICC બોલરોની રેન્કિંગમાં પ્રથમ સ્થાન મેળવ્યું છે. રબાડા તાજેતરમાં શાનદાર ફોર્મમાં છે અને તેણે બાંગ્લાદેશ સામેની બે મેચની ટેસ્ટ શ્રેણીમાં દક્ષિણ આફ્રિકાની 2-0થી જીતમાં મહત્વપૂર્ણ ભૂમિકા ભજવી હતી.