મુંબઇઃ  આ વર્ષના અંતમાં બોર્ડર-ગાવસ્કર ટ્રોફીમાં ભારત અને ઓસ્ટ્રેલિયાની ટીમો એકબીજા સામે ટકરાશે. જો કે આ સીરીઝમાં તમામની નજર ભારતીય કેપ્ટન રોહિત શર્મા અને વિરાટ કોહલી પર રહેશે, પરંતુ કાંગારુ કેપ્ટન પેટ કમિન્સ આ બંનેથી નહીં પરંતુ વિકેટકીપર બેટ્સમેન ઋષભ પંતથી ડરતો હોય તેવું લાગી રહ્યું છે. તેણે કહ્યું કે ઓસ્ટ્રેલિયામાં સતત બે ટેસ્ટ સિરીઝ જીતવાના ભારતના અભિયાનમાં પંત એક મોટું પરિબળ છે. કમિન્સે કહ્યું કે આ વખતે તેની ટીમ પંતને રોકવા પર વધુ ધ્યાન આપશે.
26 વર્ષીય પંતે 2018-19 અને 2020-21ના ઓસ્ટ્રેલિયા પ્રવાસમાં ભારતની ઐતિહાસિક જીતમાં મહત્વની ભૂમિકા ભજવી હતી. પંતે તાજેતરમાં બાંગ્લાદેશ સામેની ટેસ્ટ શ્રેણી દ્વારા 2022 માં ભયાનક કાર અકસ્માત પછી પુનરાગમન કર્યું હતું. તેનું પુનરાગમન જોરદાર રહ્યું હતું, જ્યાં તેણે ચેન્નાઈમાં રમાયેલી પ્રથમ ટેસ્ટની બીજી ઈનિંગમાં ઝડપી સદી ફટકારી હતી. કમિન્સે સ્ટાર સ્પોર્ટ્સ પર એક ઇન્ટરવ્યુ દરમિયાન કહ્યું, 'તે એક એવો ખેલાડી છે જેણે કેટલીક શ્રેણીમાં મોટી અસર કરી છે અને અમારે તેને શાંત રાખવાનો પ્રયાસ કરવો પડશે.'
પંતે તેની ટીમને અગાઉના ઓસ્ટ્રેલિયન પ્રવાસોમાં રિવર્સ સ્વીપ અને એક હાથે ફ્લિક શોટ દ્વારા ઐતિહાસિક સફળતા અપાવી હતી. પંતે 8 મેચની 12 ઇનિંગ્સમાં 62.40ની એવરેજથી 624 રન બનાવ્યા, જેમાં તેનો હાઇ સ્કોર 159 રન હતો. ભારતે પ્રખ્યાત ગાબા મેદાન પર પંતની 89 રનની અણનમ ઇનિંગને કારણે 2021માં માત્ર મેચ જ જીતી ન હતી, પરંતુ આ મેદાન પર કાંગારૂ ટીમના 32 વર્ષના શાસનનો પણ અંત આણ્યો હતો.
ટીમ ઈન્ડિયા આ શ્રેણી 2-1થી જીતવામાં સફળ રહી હતી. પંત વિશે કમિન્સે કહ્યું, 'ઋષભ પંત જેવો ખેલાડી ગમે ત્યારે રિવર્સ સ્વીપ રમી શકે છે અને તે અવિશ્વસનીય શોટ છે. મને લાગે છે કે આપણે તેનાથી વધુ ટેવાઈ ગયા છીએ. દરેક ટીમમાં એક કે બે ખેલાડી હોય છે જે રમતને આગળ લઈ જઈ શકે છે. અમારી પાસે ટ્રેવિસ હેડ અને મિશેલ માર્શ છે.' તમને જણાવી દઈએ કે ઓસ્ટ્રેલિયા 2014-15 પછી ભારત સામે તેની પ્રથમ ટેસ્ટ શ્રેણી જીતવા માંગે છે. બંને ટીમો વચ્ચે 22 નવેમ્બરથી પર્થમાં પાંચ મેચોની શ્રેણી શરૂ થશે.