નવી દિલ્હી. ભારતીય હોકી ટીમે સોમવારે એશિયન હોકી ચેમ્પિયન્સ ટ્રોફી 2024ની સેમી ફાઇનલમાં કોરિયાને 4-1થી હરાવ્યું હતું. આ સાથે ભારતીય ટીમ ફાઈનલમાં પહોંચી ગઈ છે. ભારતીય ટીમ ફાઇનલમાં ચીન સામે ટકરાશે. પ્રથમ સેમિફાઇનલમાં ચીને પાકિસ્તાનને પેનલ્ટી શૂટઆઉટમાં હરાવ્યું હતું.

  ટુર્નામેન્ટમાં ભારતીય હોકી ટીમની સફર અત્યાર સુધી શાનદાર રહી છે. હરમનપ્રીત સિંહની કેપ્ટનશીપવાળી ટીમને અત્યાર સુધી એક પણ મેચમાં હારનો સામનો કરવો પડ્યો નથી. આવી સ્થિતિમાં હવે ટીમ આ પ્રદર્શનને ફાઈનલમાં જાળવી રાખવાનો પ્રયાસ કરશે. ભારતીય હોકી ટીમે લીગ તબક્કામાં તમામ 5 મેચ જીતી હતી.

   ભારતીય ટીમે પહેલા ક્વાર્ટરથી જ મેચ પર પોતાની પકડ મજબૂત કરી લીધી હતી. 13મી મિનિટે અરજિત સિંહના પાસ પર ઉત્તમ સિંહે ગોલ કરીને ભારતને મેચમાં લીડ અપાવી હતી. ભારતીય ટીમ પહેલા ક્વાર્ટરમાં 1-0થી આગળ હતી. 

     બીજા ક્વાર્ટરમાં ભારતીય હોકી ટીમે તેની લીડ બમણી કરી હતી. કેપ્ટન હરમનપ્રીત સિંહે 19મી મિનિટે શાનદાર ગોલ કર્યો હતો. પ્રથમ હાફ સુધી ભારતીય ટીમ 2-0થી આગળ હતી. પ્રથમ હાફ સુધી મેચમાં ભારતનો દબદબો જોવા મળ્યો હતો 

  ટીમ ઈન્ડિયાએ ત્રીજા ક્વાર્ટરની શરૂઆતમાં પોતાની લીડ ત્રણ ગણી કરી હતી. ભારત માટે ત્રીજો ગોલ જરમનપ્રીત સિંહે કર્યો હતો. કોરિયાએ 33મી મિનિટે શાનદાર વાપસી કરી હતી. યાંગ જિહુને પેનલ્ટી કોર્નર પર ગોલ કરીને સ્કોર 3-1 કર્યો હતો. ત્રીજા ક્વાર્ટરની છેલ્લી મિનિટોમાં હરમનપ્રીત સિંહે પેનલ્ટી કોર્નરથી ગોલ કર્યો હતો. આ પછી ચોથા ક્વાર્ટરમાં બંને ટીમો એક પણ ગોલ કરી શકી ન હતી. ભારતે આ મેચ 4-1થી જીતી લીધી હતી.