મુંબઈ : પ્રો કબડ્ડી લીગ 2024 માટે હરાજીનો પ્રથમ દિવસ રેકોર્ડથી ભરેલો હતો. લાંબા સમયથી પટના પાઇરેટ્સ સાથે રમી રહેલા સચિન તંવરને તમિલ થલાઈવાસે 2.15 કરોડ રૂપિયામાં ખરીદ્યો હતો. આ ખરીદીથી સચિન પ્રો કબડ્ડી લીગના ઈતિહાસનો સૌથી મોંઘો ખેલાડી બની ગયો. પ્રો કબડ્ડી 2024ની હરાજીમાં સૌથી મહત્વની વાત એ હતી કે પટના પાઇરેટ્સના મોટાભાગના સ્ટાર ખેલાડીઓને અન્ય ટીમોએ ખરીદ્યા હતા. સચિન તંવર, મોહમ્મદરેઝા ચિયાનેહ અને ગુમાન સિંહે પટના પાઇરેટ્સ છોડી દીધા.

   પ્રો કબડ્ડી લીગ 2024ની હરાજીના પ્રથમ દિવસે સચિન તંવર સૌથી મોંઘો ખેલાડી હતો, જ્યારે મોહમ્મદરેઝા ચિયાનેહને હરિયાણા સ્ટીલર્સે રૂ. 2.07 કરોડમાં ખરીદ્યો હતો અને તે ઈતિહાસનો સૌથી મોંઘો ઓલરાઉન્ડર હતો. ગુમાન સિંહને ગુજરાત જાયન્ટ્સે રૂ. 1.97 કરોડમાં ખરીદ્યો હતો અને પવન સેહરાવતને તેલુગુ ટાઇટન્સે રૂ. 1.72 કરોડમાં જાળવી રાખ્યો હતો. બેંગલુરુ બુલ્સના કેએસ ભારતને યુપી યોદ્ધાએ રૂ. 1.30 કરોડમાં સાઈન કર્યા હતા.

   રોહિત ગુલિયા અને વિશાલ ભારદ્વાજ જેવા ખેલાડીઓ પ્રથમ દિવસે વેચાયા વગરના રહ્યા, જ્યારે સિદ્ધાર્થ દેસાઈને દબંગ દિલ્હીએ માત્ર રૂ. 26 લાખમાં ખરીદ્યો. તે દિલ્હી માટે લોટરી જીતવા જેવું હતું. પરદીપ નરવાલની ટીમમાં ફેરફાર થયો છે અને તે હવે બેંગલુરુ બુલ્સ સાથે રમશે. ફઝલ અત્રાચલીને ફરી એકવાર બંગાળ વોરિયર્સે ખરીદ્યો છે અને તે મનીન્દર સિંહ સાથે મળીને ટીમને ચેમ્પિયન બનાવવા માટે વિરોધીઓ સામે ટકરાશે.