નવી દિલ્હી: ભારત અને શ્રીલંકા વચ્ચે આ મહિનાના અંતમાં યોજાનારી T20 અને ODI શ્રેણીનું શેડ્યૂલ જાહેર કરવામાં આવ્યું છે. શ્રીલંકા પ્રવાસની શરૂઆત ટી-20 શ્રેણીથી થશે જ્યારે વનડે શ્રેણી 1 ઓગસ્ટથી શરૂ થશે. ભારતે શ્રીલંકા પ્રવાસ પર ત્રણ ત્રણ મેચની T20 અને ODI શ્રેણી રમવાની છે.ભારત શ્રીલંકા સામે 26 અને 27 જુલાઈએ સતત બે દિવસે T20 મેચ રમશે જ્યારે આ શ્રેણીની અંતિમ મેચ 29 જુલાઈએ રમાશે. વનડે શ્રેણીની અન્ય બે મેચો 4 અને 7 ઓગસ્ટે રમાશે.T-20 શ્રેણીની ત્રણેય મેચ પલ્લેકલેમાં રમાશે અને ત્રણેય ODI મેચો કોલંબોમાં રમાશે. ભારતીય કોચ તરીકે ગૌતમ ગંભીરનો પણ આ પહેલો પ્રવાસ હશે. મંગળવારે સાંજે ભારતીય ટીમના નવા મુખ્ય કોચના પદ માટે ગંભીરના નામની જાહેરાત કરવામાં આવી હતી. રાહુલ દ્રવિડનો કાર્યકાળ પૂરો થયો ત્યારથી ગંભીરનું નામ આગામી મુખ્ય કોચની રેસમાં આગળ હતું. ગંભીર પાસે આંતરરાષ્ટ્રીય સ્તરે કોચિંગનો અનુભવ નથી, પરંતુ IPLમાં તેની મેન્ટરશિપ હેઠળ, લખનૌ સુપર જાયન્ટ્સ સતત બે વખત છેલ્લા ચારમાં પ્રવેશી હતી જ્યારે કોલકાતા નાઈટ રાઈડર્સે ગઈ સિઝનમાં તેમના IPL ઈતિહાસમાં ત્રીજી ટ્રોફી જીતી હતી.ભારતે અગાઉ જુલાઈ 2021માં મર્યાદિત ઓવરોની શ્રેણી માટે શ્રીલંકાનો પ્રવાસ કર્યો હતો. શિખર ધવન તે પ્રવાસમાં ભારતીય ટીમનો કેપ્ટન હતો જ્યારે રાહુલ દ્રવિડ કાર્યકારી કોચ તરીકે તે પ્રવાસ પર ગયો હતો.ટી20 વર્લ્ડ કપ બાદ ભારતીય ટીમનો આ બીજો પ્રવાસ હશે. હાલમાં ટીમ ઈન્ડિયા ઝિમ્બાબ્વેમાં પાંચ મેચની T20 સીરીઝ રમી રહી છે. T20 વર્લ્ડ કપ 2024માં શ્રીલંકાની ટીમ લીગ સ્ટેજમાંથી બહાર થઈ ગઈ હતી. હાલમાં તેના ખેલાડીઓ લંકા પ્રીમિયર લીગમાં પોતાનો હાથ અજમાવી રહ્યા છે.