​અમદાવાદ:વેસ્ટ ઈન્ડીઝ સામેની વન-ડે શ્રેણી પૂર્ણ થયા બાદ ભારતીય ક્રિકેટ ટીમ માટે આગામી સમય ભારે દોડધામ અને પડકારજનક સાબિત થવાનો છે. ભારતીય ટીમ માત્ર ૨૬ દિવસના ટૂંકા સમયગાળામાં ૧૦ ટી-૨૦ આંતરરાષ્ટ્રીય મેચોનો ધમાકેદાર સંગ્રામ ખેલવા મેદાનમાં ઉતરશે. ક્રિકેટ ચાહકો માટે આ દિવસોમાં ટી-૨૦ રોમાંચનો ઘોડાપૂર જોવા મળશે, જેમાં ભારતીય ટીમ પહેલાં હોમ ગ્રાઉન્ડ પર કેરેબિયન ટીમ સામે બાવડાં બતાવશે અને ત્યારબાદ તરત જ ન્યૂઝીલેન્ડના પ્રવાસે રવાના થશે.

​ટીમ ઈન્ડિયાનો આ વ્યસ્ત શિડ્યુલ લખનઉના એકાના સ્ટેડિયમથી શરૂ થઈ રહ્યો છે. વેસ્ટ ઈન્ડીઝ સામેની ૫ મેચોની ટી-૨૦ શ્રેણીનો પ્રથમ મુકાબલો ૬ ઓક્ટોબરે ખેલાશે. આ શ્રેણીની બીજી મેચ ૯ ઓક્ટોબરે રાંચીમાં, ત્રીજી મેચ ૧૧ ઓક્ટોબરે ઈન્દોરમાં, ચોથી મેચ ૧૪ ઓક્ટોબરે હૈદરાબાદમાં અને અંતિમ ટી-૨૦ મેચ ૧૭ ઓક્ટોબરે બેંગલુરુના એમ. ચિન્નાસ્વામી સ્ટેડિયમ ખાતે યોજાશે.

​સ્વદેશી શ્રેણી પૂરી થતાં જ ભારતીય ટીમ વિરામ લીધા વિના ન્યૂઝીલેન્ડના કઠિન પ્રવાસે પહોંચશે, જ્યાં ૫ મેચોની અન્ય ટી-૨૦ શ્રેણીમાં કીવીઓ સાથે શિંગડા ભેરવશે. ન્યૂઝીલેન્ડ સામે પ્રથમ ટી-૨૦ મેચ ૨૨ ઓક્ટોબરે ક્રાઈસ્ટચર્ચમાં ખેલાશે. બીજી મેચ ૨૪ ઓક્ટોબરે ક્રાઈસ્ટચર્ચમાં, ત્રીજી મેચ ૨૭ ઓક્ટોબરે વેલિંગ્ટનમાં, ચોથી મેચ ૩૦ ઓક્ટોબરે ઓકલેન્ડમાં અને પાંચમી તથા આખરી ટી-૨૦ મેચ ૧ નવેમ્બરે હેમિલ્ટનમાં યોજાશે.

​આગામી ટી-૨૦ વર્લ્ડ કપ પહેલાં ખેલાડીઓની ફિટનેસ, યુવા પ્રતિભાઓનું પરીક્ષણ અને ટીમનું કોમ્બિનેશન સેટ કરવા માટે આ ૧૦ મેચો અત્યંત મહત્વપૂર્ણ માનવામાં આવી રહી છે. સતત પ્રવાસ અને ટૂંકા વિરામ વચ્ચે ખેલાડીઓના વર્કલોડને મેનેજ કરવો એ પણ ટીમ મેનેજમેન્ટ માટે મોટો પડકાર રહેશે.