દીપેશ સામાણી દ્વારા, દ્વારકા:દેવભૂમિ દ્વારકા જિલ્લામાં આવેલા સુપ્રસિદ્ધ યાત્રાધામ જગત મંદિર ખાતે આગામી પવિત્ર “અધિક જેઠ સુદ-૧૫ (પૂનમ)” ના તહેવારને લક્ષમાં રાખીને દર્શનના નિત્યક્રમમાં મહત્વપૂર્ણ ફેરફારો કરવામાં આવ્યા છે. શ્રી દ્વારકાધીશ મંદિરની વહીવટદાર કચેરી દ્વારા દેશ-વિદેશથી આવતા લાખો વૈષ્ણવો અને શ્રદ્ધાળુઓની સુવિધા માટે એક સત્તાવાર જાહેર વિજ્ઞપ્તી બહાર પાડીને ભગવાન દ્વારકાધીશના વિશેષ દર્શન અને આરતીના સમયપત્રકની જાહેરાત કરવામાં આવી છે. અધિક માસની પૂનમ અને દેવ દિવાળીના આ ખાસ ઉત્સવના દિવસે ભક્તો ભગવાન કાળિયા ઠાકોરના દર્શનનો સુચારૂ રૂપે લાભ લઈ શકે તે માટે વહીવટી તંત્ર દ્વારા તમામ તૈયારીઓ પૂર્ણ કરી લેવામાં આવી છે.
મંદિર વહીવટદાર કચેરી દ્વારા જાહેર કરાયેલા સત્તાવાર સમયપત્રક અનુસાર, પૂનમના પવિત્ર દિવસે શ્રીજીની મંગલા આરતી નિયત સમય કરતા વહેલી એટલે કે સવારે ૦૫:૦૦ વાગ્યે કરવામાં આવશે. ત્યારબાદ સવારે ૦૫:૦૦ થી ૦૮:૦૦ વાગ્યા સુધી ભક્તો મંગળા દર્શનનો લાભ લઈ શકશે. સવારે ૦૮:૦૦ થી ૦૯:૧૫ વાગ્યા સુધી ભગવાનનો વિશેષ અભિષેક પૂજા ચાલશે, જે દરમિયાન દર્શન સંપૂર્ણપણે બંધ રહેશે. અભિષેક બાદ સવારે ૦૯:૧૫ થી ૦૯:૪૫ સુધી શ્રૃંગાર દર્શન ખુલ્લા રહેશે. તે પછી સવારે ૦૯: doctor૪૫ થી ૧૦:૦૦ વાગ્યા સુધી સ્નાન ભોગ માટે દર્શન બંધ રાખવામાં આવશે અને પુનઃ સવારે ૧૦:૦૦ થી ૧૦:૩૦ વાગ્યા સુધી શ્રૃંગાર દર્શન ખોલવામાં આવશે.
આગળના ક્રમમાં સવારે ૧૦:૩૦ થી ૧૦:૪૫ વાગ્યા સુધી શ્રૃંગાર ભોગ અર્થે દર્શન બંધ રહેશે, જે બાદ સવારે ૧૦:૪૫ થી ૧૧:૦૦ વાગ્યા સુધી ભવ્ય શ્રૃંગાર આરતીના દર્શન થશે. સવારે ૧૧:૦૦ થી ૧૧:૧૫ સુધી સામાન્ય દર્શન ચાલુ રહેશે અને ત્યારબાદ સવારે ૧૧:૧૫ થી ૧૧:૩૦ વાગ્યા સુધી ગ્વાલ ભોગ માટે દર્શન બંધ રાખવામાં આવશે. ત્યારબાદ સવારે ૧૧:૩૦ થી બપોરે ૧૨:૦૦ વાગ્યા સુધી પુનઃ દર્શન ચાલુ રહેશે. બપોરે ૧૨:૦૦ થી ૧૨:૩૦ વાગ્યા સુધી રાજભોગ ધરાવવા માટે દર્શન બંધ કરાશે અને બપોરે ૧૨:૩૦ થી ૦૧:૦૦ વાગ્યા સુધી ભક્તો રાજભોગ દર્શનનો લાભ લઈ શકશે. બપોરે ૦૧:૦૦ વાગ્યે મંદિર અનોસર (મંદિર બંધ) થશે. વહીવટદાર કચેરીએ સ્પષ્ટ કર્યું છે કે સાંજની સેવાના અન્ય ક્રમ નિત્યક્રમ મુજબ રહેશે અને ઉત્સવના વિશેષ દર્શન સાંજના સમયે યોજાશે.
શ્રી દ્વારકાધીશ મંદિરના વહીવટદાર અને નાયબ કલેકટર હિમાંશુ ચૌહાણ (GAS) દ્વારા જણાવાયું છે કે, જે યાત્રિકો પ્રત્યક્ષ રીતે મંદિરે આવી શકતા નથી, તેઓ પણ આ પાવન પર્વનો લાભ લઈ શકે તે માટે ખાસ વ્યવસ્થા ઉભી કરાઈ છે. મંદિરના ઓફિસીયલ સોશિયલ મીડિયા અને ડિજિટલ માધ્યમો દ્વારા લાઈવ દર્શન કરવા માટે એક સત્તાવાર 'QR CODE' પણ આ જાહેર વિજ્ઞપ્તી સાથે જારી કરવામાં આવ્યો છે, જેને સ્કેન કરીને ભક્તો ઘરે બેઠા ભગવાન દ્વારકાધીશની ઝાંખી કરી શકશે.
આ મહત્વપૂર્ણ વ્યવસ્થા અંગેની નકલ દેવભૂમિ દ્વારકા (ખંભાળીયા) ના કલેક્ટર, જિલ્લા વિકાસ અધિકારી અને પોલીસ અધીક્ષકને સવિનય જાણ સારું રવાના કરવામાં આવી છે. આ ઉપરાંત સ્થાનિક સ્તરે સુરક્ષા અને વ્યવસ્થા જળવાઈ રહે તે માટે દ્વારકાના પ્રાંત અધિકારી, મંદિર સુરક્ષાના ડી.વાય.એસ.પી., મામલતદાર, પોલીસ ઇન્સ્પેકટર તેમજ પૂજારી પ્રતિનિધિ અને વારાદાર પૂજારીને પણ જાણ કરવામાં આવી છે. વિગતવાર માહિતી જોવા માટે આ સાથે આપેલ પીડીએફ ફાઈલ ડાઉનલોડ કરો.