(વિનુ જોશી દ્વારા)જૂનાગઢ : જૂનાગઢના ગીરીરાજ મેઈન રોડ, ચિત્રકૂટ સોસાયટીમાં રહેતા 58 વર્ષીય વૃદ્ધા સુનિતાબેન રમેશભાઈ રામજાણીની ઘરમાં ઘૂસીને કરાયેલી ઘૃણાસ્પદ હત્યાનો ભેદ ક્રાઇમ બ્રાન્ચે ગણતરીના દિવસોમાં ઉકેલી નાખ્યો છે. પોલીસે આ કેસમાં ફરિયાદીના જ મિત્ર સુરેશ ઉર્ફે કાનો વાઘવાણીની ધરપકડ કરી છે. આરોપીએ રૂપિયાની લાલચમાં હત્યા કરી હોવાની કબૂલાત કરી છે.

 

બનાવની વિગત

 

તા. 12/05/2026ના રોજ રાત્રે 19:00 થી 21:15 દરમિયાન સુનિતાબેન પોતાના મકાનમાં એકલા હતા ત્યારે અજાણ્યા ઈસમે ઘરમાં પ્રવેશ કરી તિક્ષ્ણ હથિયાર વડે જીવલેણ હુમલો કરી ગળું કાપી નાખ્યું હતું. ગંભીર ઈજાના કારણે તેમનું મોત નિપજ્યું હતું. આ અંગે તા. 13/05/2026ના રોજ બી ડિવીઝન પોલીસ સ્ટેશનમાં ભારતીય ન્યાય સંહિતાની કલમ 103(1), 332(એ) તથા જી.પી. એક્ટ કલમ 135 મુજબ ગુનો દાખલ થયો હતો.

 

 

પોલીસ કાર્યવાહી

 

 

ગુનાની ગંભીરતા ધ્યાને લઈ નાયબ પોલીસ મહાનિરીક્ષક રાજેન્દ્રસિંહ ચુડાસમા અને પોલીસ અધિક્ષક સુબોધ ઓડેદરાના માર્ગદર્શન હેઠળ નાયબ પોલીસ અધિક્ષક હિતેષ ધાંધલ્યાની આગેવાનીમાં ક્રાઇમ બ્રાન્ચ પીઆઈ કે.એમ. પટેલ અને બી ડિવીઝન પીઆઈ એ.બી. ચૌધરીની અલગ અલગ ટીમો બનાવાઈ હતી.

ટીમોએ હ્યુમન સોર્સ, ટેકનિકલ એનાલિસિસ, CCTV ફૂટેજ, ડ્રોનથી એરિયલ વ્યૂમેપ અને આસપાસના શકમંદોની પૂછપરછ દ્વારા તપાસ હાથ ધરી. તપાસ દરમિયાન ફરિયાદીનો મિત્ર સુરેશ ઉર્ફે કાનો વાઘવાણી શંકાના દાયરામાં આવ્યો. સબળ પુરાવા મળતા તેની અટકાયત કરી પૂછપરછ કરતા તે ભાંગી પડ્યો હતો.

 

 

આરોપીની કબૂલાત

 

 

આરોપીએ કબૂલ્યું કે રૂપિયાની લાલચમાં તેણે હત્યા કરી હતી. હત્યા બાદ પોતે નિર્દોષ હોવાનો ડોળ કરવા માટે તે ઘટના સ્થળે ગયો, મરણજનારની અંતિમ વિધિમાં પણ હાજર રહ્યો અને પોલીસની ગતિવિધિ પર નજર રાખતો હતો.

 

પકડાયેલ આરોપી

 

સુરેશ ઉર્ફે કાનો વાઘુભાઈ ચંદનદાસ વાઘવાણી, ઉં.વ. 38, ધંધો: ટીફીન સર્વિસ  રહે. "શિવ શક્તિ", અંબિકા સોસાયટી, સાઈબાબા એપાર્ટમેન્ટની સામે, નાથાભાઈ મોરીના મકાનમાં ભાડેથી, ગીરીરાજ મેઈન રોડ, જૂનાગઢ.  આરોપીને રાઉન્ડઅપ કરી વધુ કાર્યવાહી માટે બી ડિવીઝન પોલીસ સ્ટેશનને સોંપવામાં આવ્યો છે.

 

 કામગીરી કરનાર પોલીસ અધિકારી/કર્મચારી

 

  

આ કેસ ડિટેક્ટ કરવામાં નાયબ પોલીસ અધિક્ષક હિતેષ ધાંધલ્યા, પીઆઈ કે.એમ. પટેલ, પીઆઈ એ.બી. ચૌધરી સહિત ક્રાઇમ બ્રાન્ચ અને બી ડિવીઝનના અનેક પોલીસ કર્મચારીઓએ રાત-દિવસ મહેનત કરી હતી.(તસ્વીર:મુકેશ વાધેલા-જુનાગઢ)