(પ્રવિણ વ્‍યાસ દ્વારા) મોરબી, તા.૨૨: શહેરમાં રેલવે સ્‍ટેશન રોડ પર રૂ. ૧.૭૫ કરોડના ખર્ચે તૈયાર કરવામાં આવેલો ‘સુરજબાગ' ગત ૨ ઓક્‍ટોબરના રોજ લોકો માટે ખુલ્લો મુકવામાં આવ્‍યો હતો. આ સુરજબાગ કાર્યરત થયાને થોડા જ દિવસોમાં હાલ દરરોજ અંદાજે ૪૦૦ જેટલા લોકો આ બાગની મુલાકાત લઈ રહ્યા છે. ગઈકાલે મ્‍યુનિસિપલ કમિશનર સંગીતા રૈયાણી દ્વારા સુરજબાગની મુલાકાત લેવામાં આવી હતી અને બાગ અંગે લોકોના ઙ્કતિભાવો જાણવામાં આવ્‍યા હતા. લોકોની સુખાકારી માટે સુરજબાગમાં જ્‍યાં યોગા સેન્‍ટર બનાવવામાં આવ્‍યું છે તેની આસપાસ જ જિમ માટેના નવા બે સાધનો મુકવાનો નિર્ણય લેવાયો છે. જેમાં એક સાઇકલ સહિત બે સાધનો આગામી એકાદ અઠવાડિયામાં જ મૂકી દેવાની કાર્યવાહી હાથ ધરવામાં આવી છે.

સુરજબાગની સાથે સાથે મોરબીના શંકરબાગનું પણ અત્‍યારે ડેવલપમેન્‍ટ ચાલી રહ્યું છે. અંદાજિત રૂ. ૨ કરોડના ખર્ચે શંક૨બાગ બની રહ્યો છે અને તેની કામગીરી હાલ પ્રગતિમાં છે. મ્‍યુનિસિપલ કમિશનરે વ્‍યક્‍ત કરેલી શકયતા મુજબ આગામી ડિસેમ્‍બર મહિનાના અંત સુધીમાં આ શંકરબાગનું કામ પૂર્ણ થઈ જશે. જેથી ડિસેમ્‍બર માસમાં વધુ એક બાગ શહેરીજનો માટે ખુલ્લો મુકવામાં આવે તેવી પ્રબળ શકયતાઓ છે, જેનાથી મોરબીવાસીઓને હરવાફરવા માટે વધુ એક સુંદર સ્‍થળ મળી રહેશે.