[જૂનાગઢ] : ગિરનારની મુલાકાતે ગયેલા ખેડાના મોદજ ગામના ૧૨ વર્ષીય મયુરસિંહ ચૌહાણનું સિંહના હુમલામાં અકાળે અવસાન થતા સમગ્ર પંથકમાં ઘેરા શોકની લાગણી પ્રસરી ગઈ છે. ધોરણ-૫ માં અભ્યાસ કરતો મયુર તેના પરિવાર સાથે પ્રવાસમાં જોડાયો હતો, પરંતુ કુદરતને કંઈક બીજું જ મંજૂર હતું. ગિરનારની સરહદ નજીક એકાએક સિંહે તરાપ મારી મયુરને ફાડી ખાતા પરિવારના એકના એક દીકરાએ જીવ ગુમાવ્યો હતો.

મયુરનો પાર્થિવ દેહ વતન મોદજ ગામે લાવવામાં આવતા જ આજે સવારે ગૌતમનગરમાં આક્રંદ અને શોકનું વાતાવરણ છવાઈ ગયું હતું. મહેમદાવાદના ધારાસભ્ય અર્જુનસિંહ ચૌહાણે અંતિમયાત્રામાં હાજર રહી શોકાતુર પરિવારને સાંત્વના પાઠવી હતી અને સરકાર તરફથી શક્ય તેટલી આર્થિક સહાય અપાવવાની ખાતરી આપી હતી. અંતિમયાત્રા દરમિયાન પરિવાર અને ગ્રામજનોના હૈયાફાટ રુદનથી આખું ગામ હિબકે ચડી ગયું હતું.

આ કરુણ ઘટનાને પગલે ગ્રામજનોમાં વન વિભાગ અને વહીવટીતંત્ર સામે ભારે રોષ જોવા મળી રહ્યો છે. સ્થાનિકોએ માંગ કરી છે કે આ હુમલાની જવાબદારી નક્કી કરીને યોગ્ય તપાસ કરવામાં આવે અને પીડિત પરિવારને વહેલી તકે ન્યાય મળે. પ્રવાસનું આયોજન કરનારાઓ અને વન્ય પ્રાણીઓની સુરક્ષામાં રહેલી ખામીઓને લઈ લોકોમાં સવાલો ઉભા થઈ રહ્યા છે.

હવે સરકાર આ પરિવારને સહાય આપવા માટેની પ્રક્રિયા ઝડપી બનાવે તેવી માંગ પ્રબળ બની છે. આ ઘટનાએ પ્રવાસન સ્થળોએ વન્ય પ્રાણીઓથી સુરક્ષા અંગે ફરી એકવાર ગંભીર ચિંતાઓ જન્માવી છે. તંત્ર દ્વારા આગામી સમયમાં આવી દુર્ઘટનાઓ રોકવા માટે કેવા કડક પગલાં લેવાય છે, તેના પર સૌની નજર ટકેલી છે.