રાજકોટ જિલ્લાના ઉપલેટા પંથકમાં છેલ્લા ઘણા સમયથી વરસાદે ખેંચાણ રાખી હતી, જેના કારણે લોકો અસહ્ય ગરમી અને બફારાથી તોબા પોકારી ઉઠ્યા હતા. પરંતુ આજે બપોર બાદ અચાનક હવામાનમાં મોટો પલટો જોવા મળ્યો હતો. આકાશમાં કાળાડિબાંગ વાદળો ઘેરાયા હતા અને ગરમી તથા બફારા વચ્ચે ધીમી ધારે મેઘરાજાનું આગમન થયું હતું. વરસાદી ઝાપટાં શરૂ થતાં જ વાતાવરણમાં આહલાદક ઠંડક પ્રસરી ગઈ હતી, જેનાથી સ્થાનિક રહીશોને ગરમીમાંથી મોટી રાહત મળી છે.