સુરેન્દ્રનગર : સુરેન્દ્રનગર શહેરમાં મહિલા સુરક્ષાને ગંભીર આંચકો પહોંચાડતી એક ઘટના પ્રકાશમાં આવી છે, જેમાં ૮૦ ફૂટ રોડ પર આવેલી ટીબી હોસ્પિટલ પાસે ચાલતા 'ક્લબ ૭૧' જિમના સંચાલક અમીન મુલતાની દ્વારા જિમમાં આવતી યુવતીઓ સાથે મિત્રતા કે નજીકના સંબંધો કેળવી તેમના ગુપ્ત ફોટા અને વીડિયો મેળવીને તેને વાયરલ કરવાની ધમકી આપી બ્લેકમેલ કરવામાં આવતો હોવાનો ગંભીર આક્ષેપ થયો છે.

આ મામલો સામે આવતાની સાથે જ પોલીસ અને વહીવટી તંત્રમાં દોડધામ મચી ગઈ હતી અને ઘટનાની ગંભીરતાને ધ્યાને લઈને એએસપી તેમજ પોલીસ વિભાગના ઉચ્ચ અધિકારીઓ તાત્કાલિક ઘટનાસ્થળે દોડી આવ્યા હતા, તથા આરોપી જિમ સંચાલકની અટકાયત કરીને કાયદેસરની પૂછપરછ શરૂ કરી દીધી હતી.

પોલીસ દ્વારા ત્વરિત કાર્યવાહીના ભાગરૂપે આરોપીના જિમ અને તેની સંબંધિત ઓફિસોને સીલ મારી દેવામાં આવ્યા છે, તેમજ પીજીવીસીએલની ટીમને બોલાવીને સ્થળ પર જ વીજ કનેક્શન કાપી નાખવામાં આવ્યું છે જેથી ગેરકાયદેસર પ્રવૃત્તિઓ પર અંકુશ મેળવી શકાય.

આ હાઈપ્રોફાઈલ કેસમાં વધુ પુરાવાઓ એકત્રિત કરવા માટે પોલીસે જિમમાંથી સીસીટીવી ફૂટેજ, પેનડ્રાઈવ અને વોટ્સએપ ચેટ સહિતના ડિજિટલ પુરાવાઓ કબજે કર્યા છે અને જિમ સાથે સંકળાયેલા અન્ય સ્ટાફની પણ ઊંડાણપૂર્વક પૂછપરછ હાથ ધરી છે.

આરોપી દ્વારા અગાઉ પણ કેટલી યુવતીઓને શિકાર બનાવવામાં આવી છે અને આ રેકેટમાં અન્ય કોઈ સંડોવાયેલ છે કે નહીં તે દિશામાં પોલીસે તપાસ વધુ વેગવંતી બનાવી છે, જેથી પીડિત યુવતીઓને ન્યાય અપાવી શકાય અને આવા તત્વો સામે દાખલારૂપ કાર્યવાહી થઈ શકે.