જામનગર, તા.૧૬: જામનગર શહેરમાં ગણેશ મહોત્‍સવની ઉજવણી અંતર્ગત મહાનગરપાલિકા દ્વારા ગણેશ મૂર્તિઓના વિસર્જન માટે તૈયાર કરવામાં આવેલા બંને વિસર્જન કુંડ ખાતે ગણેશજીની વિદાયનો ક્રમ શરૂ થયો છે. ગણેશ ચતુર્થીના પર્વે સ્‍થાપના કરવામાં આવેલા ગણપતિજીની એક દિવસ બાદ વિસર્જન કરવાની પરંપરા અંતર્ગત ગઈકાલે તા. ૧૫ સપ્‍ટેમ્‍બરે શહેરના બંને વિસર્જન કુંડમાં કુલ ૬૮ ગણેશ મૂર્તિઓનું વિસર્જન કરવામાં આવ્‍યું હતું.

ગણેશ ભક્‍તો દ્વારા પોતાના ઘેર તથા વિવિધ સ્‍થળોએ સ્‍થાપિત કરવામાં આવેલી ગણેશજીની મૂર્તિઓને વિસર્જન માટે મહાનગરપાલિકા દ્વારા નિર્ધારિત કુંડ ખાતે લાવવામાં આવી હતી. મહાનગર પાલિકાની ટીમ દ્વારા મૂર્તિઓના વિસર્જનની પ્રક્રિયા પૂર્ણ કરવામાં આવી હતી.

આમ, તા.૧૫ સપ્‍ટેમ્‍બરના બીજા દિવસે ખંભાળિયા બાયપાસ અને સરદાર રિવેરા એમ બંને વિસર્જન કુંડ ખાતે મળીને કુલ ૬૮ ગણેશ મૂર્તિઓનું વિસર્જન કરવામાં આવ્‍યું હતું. જેમાં ખંભાળિયા બાયપાસ કુંડમાં ૫૧ અને સરદાર રિવેરા કુંડમાં ૧૭ મૂર્તિઓનો સમાવેશ થાય છે.

મહાનગરપાલિકા દ્વારા ગણેશ મહોત્‍સવ દરમિયાન મૂર્તિઓના વિસર્જન માટે તૈયાર કરવામાં આવેલા કુંડનો ગણેશ ભક્‍તો દ્વારા ઉપયોગ કરવામાં આવી રહ્યો છે. પર્યાવરણની જાળવણી સાથે ગણેશજીની વિદાયની પ્રક્રિયા સુવ્‍યવસ્‍થિત રીતે થાય તે માટે નિર્ધારિત વિસર્જન કુંડમાં જ મૂર્તિઓનું વિસર્જન કરવામાં આવી રહ્યું છે.