માંગરોળ : જૂનાગઢ જિલ્લાના માંગરોળ પંથકમાં છેલ્લા બે દિવસથી વરસી રહેલા આભ ફાટતા વરસાદે ભારે તારાજી સર્જી હતી, જેમાં નેશનલ હાઈવે-51 પર હુસૈનાબાદ ગામ નજીક આવેલો બ્રિજ પૂરમાં ધોવાઈ જતાં સૌરાષ્ટ્રના મહત્વના માર્ગનો સંપર્ક કપાઈ ગયો હતો. જોકે, મુસાફરો અને વાહનચાલકોની હાલાકીને ધ્યાનમાં રાખીને વહીવટી તંત્ર અને નેશનલ હાઇવે ઓથોરિટી દ્વારા હાથ ધરવામાં આવેલી યુદ્ધના ધોરણે કામગીરીના પરિણામે હવે આ માર્ગ ફરીથી વાહનવ્યવહાર માટે ખુલ્લો કરી દેવામાં આવ્યો છે.
પૂરના કારણે સર્જાયેલી સ્થિતિ
માંગરોળમાં 12 ઇંચથી વધુ વરસાદ ખાબકતા સ્થિતિ વિકટ બની હતી. નેશનલ હાઈવે-51 પર હુસૈનાબાદ નજીક નદીના તેજ પ્રવાહમાં બ્રિજ પાસેનો માર્ગ ધોવાઈ જતાં વહીવટી તંત્રને સુરક્ષાના ભાગરૂપે તાત્કાલિક અસરથી આ રૂટ બંધ કરવો પડ્યો હતો. સોમનાથથી દ્વારકા તરફ જતા પ્રવાસીઓ માટે આ હાઈવે ખૂબ જ મહત્વનો હોવાથી, તેમને લાંબો ફેરો કરીને જેતપુર-પોરબંદર થઈને જવાની સલાહ આપવામાં આવી હતી.
તંત્રની યુદ્ધસ્તરીય કામગીરી
પરિસ્થિતિની ગંભીરતા સમજીને વહીવટી તંત્ર અને નેશનલ હાઈવે ઓથોરિટીની ટીમ તાત્કાલિક ઘટનાસ્થળે દોડી ગઈ હતી. સતત પડી રહેલા વરસાદ વચ્ચે પણ અધિકારીઓએ જહેમત ઉઠાવીને રસ્તાનું ઝડપી સમારકામ પૂર્ણ કર્યું હતું. તંત્રની આ સક્રિયતાને કારણે માત્ર ગણતરીના કલાકોમાં જ આ હાઈવે પર વાહનવ્યવહાર પૂર્વવત કરવામાં સફળતા મળી છે, જેનાથી હજારો પ્રવાસીઓને મોટી રાહત મળી છે.
જિલ્લામાં હજુ પણ એલર્ટ
એક તરફ હાઈવે ચાલુ થયો છે, પરંતુ બીજી તરફ જિલ્લામાં મેઘમહેર હજુ પણ યથાવત છે. મેંદરડા તાલુકાના રાજાવડ ગામ નજીક આવેલી નાની સિંચાઈ યોજના 100% ભરાઈ જતાં ડેમ ઓવરફ્લો થયો છે. ડેમમાં સતત નવા પાણીની આવક થઈ રહી હોવાથી વહીવટી તંત્ર દ્વારા રાજાવડ, રાજેસર, આંબલા, ઢાંઢાવાડા, નોંઝણવાવ અને સાંગણસોલા જેવા નીચાણવાળા ગામોને સાવચેતીના ભાગરૂપે 'હાઈ-એલર્ટ' પર રાખવામાં આવ્યા છે. તંત્ર દ્વારા લોકોને નદીના પટમાં કે ડેમ નજીક ન જવાની કડક સૂચના આપવામાં આવી છે.