મુકુંદ બદીયાણી દ્વારા, જામનગર : શહેરમાં દારૂની હેરાફેરી અટકાવવા માટે પોલીસ દ્વારા સઘન પેટ્રોલિંગ અને તપાસ હાથ ધરવામાં આવી રહી છે, ત્યારે પોલીસને બાતમીના આધારે એક મોટી સફળતા મળી છે. જામનગરના ગોમતીપુર વિસ્તારમાં આવેલા જયપુર ગોલ્ડન ટ્રાન્સપોર્ટના ગોડાઉન પર પોલીસે અચાનક દરોડો પાડ્યો હતો. આ દરોડા દરમિયાન પાર્સલની આડમાં છુપાવીને લાવવામાં આવેલા ભારતીય બનાવટના વિદેશી દારૂનો મોટો જથ્થો ઝડપાઈ જતા ભારે ચકચાર મચી જવા પામી છે.

૫૦ શંકાસ્પદ પાર્સલોની તપાસમાં મળી ૨,૧૫૦ વિદેશી દારૂની બોટલો:
મળતી માહિતી મુજબ, પોલીસની ટીમે જયપુર ગોલ્ડન ટ્રાન્સપોર્ટના ગોડાઉનમાં પહોંચીને ત્યાં પડેલા આશરે ૫૦ જેટલા શંકાસ્પદ પાર્સલોની સઘન તપાસ શરૂ કરી હતી. આ પાર્સલોને ખોલીને જોવામાં આવતા અંદરથી વિદેશી દારૂની બોટલોનો મોટો જથ્થો મળી આવ્યો હતો. પોલીસે ઝીણવટભરી તપાસ હાથ ધરીને કુલ ૨,૧૫૦ વિદેશી દારૂની બોટલો કબ્જે કરી હતી. દારૂના આ જથ્થાની કુલ કિંમત રૂ. ૬,૨૦,૩૫૦ હોવાનું પોલીસ સૂત્રો દ્વારા જણાવવામાં આવ્યું છે.

'સીમરન એન્ટરપ્રાઈઝ' અને 'યુવરાજ એન્ટરપ્રાઈઝ'ના નામે કરાઈ હતી હેરાફેરી:
પોલીસની પ્રાથમિક તપાસમાં બહાર આવ્યું છે કે આ દારૂનો જથ્થો 'સીમરન એન્ટરપ્રાઈઝ' નામના નામથી મોકલવામાં આવ્યો હતો અને જામનગરમાં 'યુવરાજ એન્ટરપ્રાઈઝ' મારફતે મંગાવવામાં આવ્યો હતો. બૂટલેગરો દ્વારા પોલીસની નજરથી બચવા માટે ટ્રાન્સપોર્ટના માધ્યમથી પેકિંગ પાર્સલની આડમાં આ ગેરકાયદેસર ધંધો ચલાવવામાં આવી રહ્યો હતો.

સિટી 'બી' ડિવિઝન પોલીસ સ્ટેશનમાં પ્રોહિબિશન એક્ટ હેઠળ ગુનો નોંધાયો:
ટ્રાન્સપોર્ટ કંપનીના ગોડાઉનમાંથી દારૂનો આટલો મોટો જથ્થો પકડાઈ જતાં જામનગર પોલીસ બેડામાં દોડધામ મચી ગઈ હતી. પોલીસે માલ મોકલનાર અને માલ મંગાવનાર ઈસમો સામે સિટી 'બી' ડિવિઝન પોલીસ સ્ટેશનમાં પ્રોહિબિશન એક્ટની કલમો હેઠળ કાનૂની ગુનો નોંધીને કડક તપાસ શરૂ કરી છે. આ રેકેટની સાથે અન્ય કયા કયા શખ્સો સંડોવાયેલા છે તે દિશામાં પોલીસે વધુ તપાસ હાથ ધરી છે. (તસ્વીર - કિંજલ કારસરિયા, જામનગર)