​ગીર સોમનાથ: પવિત્ર શ્રાવણ માસના સોમવારના સનાતન પર્વ નિમિત્તે પ્રથમ જ્યોતિર્લિંગ શ્રી સોમનાથ મહાદેવ મંદિર પરિસર ખાતેથી સોમનાથ દાદાની અત્યંત ભવ્ય અને દિવ્ય પાલખી યાત્રાનું આયોજન કરવામાં આવ્યું હતું. સમગ્ર સોમનાથ તીર્થ ક્ષેત્ર અને મંદિર પરિસર ‘જય સોમનાથ’ અને ‘હર હર મહાદેવ’ના ગગનભેદી નાદથી ગૂંજી ઊઠ્યું હતું.

​સોમનાથ ટ્રસ્ટની પ્રાચીન પરંપરા મુજબ મહાદેવના પ્રતીક સ્વરૂપ શિવલિંગને આકર્ષક અને સુગંધિત પુષ્પોથી સુશોભિત કરીને પાલખીમાં બિરાજમાન કરવામાં આવ્યા હતા. શાસ્ત્રોક્ત વિધિ-વિધાન અને વૈદિક મંત્રોચ્ચાર સાથે સોમનાથ દાદાની વિશેષ પૂજા-અર્ચના કર્યા બાદ પાલખી યાત્રાની વિધિવત શરૂઆત કરવામાં આવી હતી.

​યાત્રા દરમિયાન ભગવાન સોમનાથ મહાદેવની પાલખીને નગરચર્યા માટે ફેરવવામાં આવી હતી. દેશના ખૂણે-ખૂણેથી પધારેલા હજારો શિવભક્તો અને શ્રદ્ધાળુઓએ સોમનાથ દાદાના દિવ્ય સ્વરૂપના દર્શન કરી પૂજા-અર્ચના કરી હતી. ભક્તોના ઘોડાપૂર વચ્ચે સમગ્ર વાતાવરણ ભક્તિમય બની ગયું હતું.

​શ્રાવણી સોમવાર અને પાલખી યાત્રાને પગલે સોમનાથ મંદિર પરિસર અને આસપાસના વિસ્તારોમાં સુરક્ષા અને વ્યવસ્થા જાળવવા માટે સ્થાનિક પોલીસ તંત્ર અને સોમનાથ ટ્રસ્ટ દ્વારા ચુસ્ત બંદોબસ્ત ગોઠવવામાં આવ્યો હતો. શ્રદ્ધાળુઓ સરળતાથી દર્શન કરી શકે તે માટે ઝીગઝેગ લાઈન સહિતની સુંદર વ્યવસ્થાઓ કરવામાં આવી હતી.