(પ્રવીણ વ્યાસ દ્વારા) મોરબી:પર્યાવરણના જતન અને વૃક્ષોના રક્ષણ માટે સતત કાર્યરત ‘નિર્શિવ ફાઉન્ડેશન’ મોરબી દ્વારા એક પ્રશંસનીય અને પર્યાવરણ હિતલક્ષી કામગીરી કરવામાં આવી છે. મોરબી નજીક આવેલા જોધપર-રફાળેશ્વર રોડ પર વૃક્ષોના સ્વાભાવિક વિકાસને રુંધતા લોખંડના પાંજરા દૂર કરીને ૨૦ જેટલા વૃક્ષોને ગૂંગળામણમાંથી મુક્ત કરી નવજીવન બક્ષવામાં આવ્યું છે.

વિગતવાર માહિતી મુજબ, જોધપર-રફાળેશ્વર રોડ પર અગાઉ છોડના રક્ષણ માટે લોખંડના ટ્રી-ગાર્ડ (સેફ્ટી પાંજરા) લગાવવામાં આવ્યા હતા. સમય જતાં વૃક્ષો મોટા થવાના કારણે આ લોખંડના પાંજરા વૃક્ષના થડ સાથે સજ્જડ વીંટળાઈ ગયા હતા, જેનાથી વૃક્ષોનો વિકાસ અટકી રહ્યો હતો. આ બાબત ધ્યાને આવતાં જ નિર્શિવ ફાઉન્ડેશનની ટીમે સ્થળ પર પહોંચીને ભારે જહેમત બાદ ૨૦ જેટલા વૃક્ષો પરથી આ પાંજરા સફળતાપૂર્વક હટાવ્યા હતા. સંસ્થાના સ્થાપક રોહન રાંકજાએ નાગરિકોને અપીલ કરી છે કે વૃક્ષોના વિકાસમાં અવરોધરૂપ બાબતો સામે આવે ત્યારે પર્યાવરણના રક્ષણ અર્થે દરેક નાગરિકે જાગૃત થઈ આગળ આવવું જોઈએ.