( મુકુંદ બદીયાણી દ્વારા ) જામનગર : શહેરી વિસ્તારમાં સ્વચ્છતા અને આરોગ્યપ્રદ વાતાવરણ જાળવી રાખવાના ભાગરૂપે કાલાવડ અને જામજોધપુર નગરપાલિકા દ્વારા રાત્રી સફાઈ કામગીરી હાથ ધરવામાં આવી હતી. આ ઝુંબેશ દરમિયાન સફાઈ કામગીરીનું પ્રત્યક્ષ નિરીક્ષણ કરવા સાથે સ્થાનિક વેપારીઓને સ્વચ્છતા જાળવવા માટે આવશ્યક માર્ગદર્શન આપવામાં આવ્યું હતું.
કાલાવડ નગરપાલિકાના ચીફ ઓફિસર, સેનેટરી ઈન્સપેક્ટર, સીટી મેનેજર SWM સહિતની ટીમે કાલાવડ બસ સ્ટેશન વિસ્તાર, સાગર કોમ્પ્લેક્ષ તેમજ શાક માર્કેટ નજીક આવેલી લારીઓ તથા દુકાનોની રાત્રી તપાસ હાથ ધરી હતી. આ દરમિયાન લારીધારકો પાસે કચરાપેટી ઉપલબ્ધ છે કે નહીં તથા તેઓ કચરાનો નિકાલ કઈ જગ્યાએ કરી રહ્યા છે તેની ઝીણવટભરી સમીક્ષા કરવામાં આવી હતી.
આ ઉપરાંત, જામજોધપુર નગરપાલિકા વિસ્તારમાં આવેલા મીની બસ સ્ટેશન નજીકના ખાણી-પીણી ઝોનમાં પણ નગરપાલિકા ટીમ દ્વારા સરપ્રાઈઝ સ્થળ તપાસ કરવામાં આવી હતી. આ વેળાએ ખાણી-પીણીના વેપારીઓ અને લારીધારકોને જાહેરમાં કચરો ન ફેંકવા અને તમામ કચરો ફરજિયાતપણે કચરા ગાડીમાં જ નાખવા માટે કડક સૂચનાઓ આપવામાં આવી હતી.