(વિનોદ ગાલા દ્વારા) ભુજ તા.૨૩ :  કચ્છના રાપર તા.ના ગાગોદર બ્રાન્ચ કેનાલમાં બાવળ, કચરો અને માટી ભરાઈ જતાં તેમજ માઇનોર-સબમાઇનોર કેનાલો અને પાઇપલાઇનો તૂટેલી હાલતમાં હોવાથી સમગ્ર તાલુકાના ખેડૂતો ચિંતિત બન્યા છે. રવિ વાવેતર નજીક હોવા છતાં પાણી વિતરણની વ્યવસ્થા ખોરવાયેલી છે. મોમાયમોરા, સણવા, સુખપર, આડેસર, પ્લાસવા અને કાનમેર સહિતની ડિસ્ટ્રીબ્યુટરીઓમાં પાણી પહોંચતું ન હોવાથી ખેડૂતોને પોતાના ખર્ચે ડીઝલ એન્જિનથી સિંચાઈ કરવી પડે છે. સણવા પાસે વારંવાર કેનાલ તૂટતી હોવા છતાં એસ્કેપ બનાવવાની માંગ પર કાર્યવાહી થઈ નથી. ખેડૂતોનો આક્ષેપ છે કે સફાઈ-સમારકામનાં બિલ બને છે, પરંતુ સ્થળ પર કામગીરી થતી નથી.

ખેડૂતોએ નર્મદા નિગમને તાત્કાલિક કેનાલોની સફાઈ, તૂટેલા ભાગો અને પાઇપલાઇનોનું સમારકામ, ગેટ પર વાલ્વમેનની નિમણૂક તથા સણવા પાસે એસ્કેપ બનાવવાની માંગ કરી છે. સમયસર કામગીરી નહીં થાય તો ઉગ્ર આંદોલનની ચીમકી આપવામાં આવી છે. (તસ્વીર: મુકેશ રાજગોર, રાપર)