સુરેન્દ્રનગર: ગુજરાતમાં ચાલી રહેલા સાર્વત્રિક ચોમાસા વચ્ચે છેલ્લા ૨૪ કલાકમાં સુરેન્દ્રનગર જિલ્લામાં મેઘરાજાએ ધમાકેદાર બેટિંગ કરીને જળબંબાકાર જેવી સ્થિતિ સર્જી દીધી છે. સ્ટેટ ઈમરજન્સી ઓપરેશન સેન્ટર, ગાંધીનગર દ્વારા જાહેર કરવામાં આવેલા સત્તાવાર આંકડા અનુસાર, ૧ ઓગસ્ટ સવારના ૬ વાગ્યાથી ૨ ઓગસ્ટ સવારના ૬ વાગ્યા સુધીના સમયગાળા દરમિયાન જિલ્લાના તમામ તાલુકાઓમાં ધોધમાર વરસાદ વરસ્યો છે, જેમાં ધ્રાંગધ્રા તાલુકામાં સૌથી વધુ ૬.૯૩ ઇંચ વરસાદ નોંધાયો છે.

જિલ્લામાં નોંધાયેલા વરસાદી આંકડાઓની વિગતવાર માહિતી આપતા તંત્રએ જણાવ્યું હતું કે ધ્રાંગધ્રા બાદ વઢવાણ તાલુકામાં પણ ૬.૧૮ ઇંચ જેટલો ભારે વરસાદ ખાબક્યો છે, જ્યારે લખતર તાલુકામાં ૪.૪૯ ઇંચ વરસાદ નોંધાયો છે. આ ઉપરાંત મૂળી અને ચુડા તાલુકામાં એકસમાન ૩.૬૬ ઇંચ, થાનગઢમાં ૩.૫ ઇંચ અને ચોટીલા તાલુકામાં ૩.૧૫ ઇંચ વરસાદ પડ્યો છે, જેના કારણે નીચાણવાળા વિસ્તારોમાં પાણી ભરાવાની સમસ્યા સર્જાઈ છે.

જિલ્લાના અન્ય વિસ્તારો પર નજર કરીએ તો સાયલામાં ૨.૨૮ ઇંચ, દસાડામાં ૧.૮૧ ઇંચ અને લીંબડી તાલુકામાં ૧.૨૨ ઇંચ વરસાદ સરકારી ચોપડે નોંધાયો છે. અચાનક પડેલા આ ભારે વરસાદના કારણે ખેતરોમાં પાણી ભરાઈ જવાથી પાકને નુકસાન થવાની આશંકા સેવાઈ રહી છે અને નદી-નાળાઓ તેમજ ચેકડેમોમાં નવા નીર આવ્યા છે.

ચોમાસાની આ સિઝનમાં અગાઉ પણ જિલ્લાના કેટલાક વિસ્તારોમાં અનિયમિત વરસાદ નોંધાયો હતો, પરંતુ તાજેતરના આ ભારે વરસાદથી જળસંચયની સ્થિતિમાં મોટો સુધારો થયો છે. વહીવટી તંત્ર દ્વારા સ્થિતિ પર સતત નજર રાખવામાં આવી રહી છે અને નીચાણવાળા વિસ્તારોમાં સાવચેતીના પગલાં રૂપે રાહત અને બચાવ કામગીરી માટે ટીમોને એલર્ટ રાખવામાં આવી છે.