જાફરાબાદ (અમરેલી) : અમરેલી જિલ્લાના જાફરાબાદ તાલુકા અને તેના આસપાસના ગ્રામ્ય વિસ્તારોમાં લાંબા સમયના વિરામ બાદ આખરે મેઘરાજાએ પધરામણી કરતા વાતાવરણમાં આહલાદક ઠંડક પ્રસરી ગઈ છે. છેલ્લા કેટલાક દિવસોથી અસહ્ય ઉકળાટ અને ગરમીથી ત્રાહિમામ પોકારી ગયેલા સ્થાનિક લોકોને બપોર બાદ અચાનક બદલાયેલા હવામાનને કારણે મોટી રાહત મળી છે.

જાફરાબાદ પંથકના ટીંબી, છેલણા અને હેમાળ સહિતના આસપાસના અનેક ગ્રામ્ય વિસ્તારોમાં વીજળીના કડાકા અને વાદળોના ગડગડાટ સાથે વરસાદી ઝાપટાં ખાબક્યા હતા. અચાનક જ ધોધમાર વરસેલા આ વરસાદથી ગ્રામીણ વિસ્તારોના માર્ગો પર પાણી ફરી વળ્યા હતા.

લાંબા સમયથી વરસાદે વિરામ લીધો હોવાથી ખેડૂતો પોતાના મુરઝાઈ રહેલા પાકને લઈને ભારે ચિંતામાં મુકાયા હતા. જો કે, ખરા સમયે જ વરસેલા આ વરસાદી ઝાપટાંથી પાકને નવજીવન મળવાની નવી આશા જાગી છે, જેને પગલે ધરતીપુત્રો અને ખેડૂતોના ચહેરા પર ભારે ખુશીનો માહોલ જોવા મળી રહ્યો છે.