માંગરોળ : જૂનાગઢ જિલ્લાના દરિયાકાંઠાના માંગરોળ પંથકમાં છેલ્લા કેટલાક કલાકોથી મેઘરાજાએ અતિરોદ્ર સ્વરૂપ ધારણ કરીને ધબધબાટી બોલાવી છે. અવિરત અને મુશળધાર વરસી રહેલા આભ ફાટવા જેવા વરસાદને કારણે સમગ્ર માંગરોળ પંથક જળબંબોળ થઈ ગયો છે. પૂરની સૌથી ભયાનક અને કફોડી સ્થિતિ માંગરોળની હાઈ-પ્રોફાઈલ ગણાતી 'ન્યૂ સાગર સોસાયટી'માં સર્જાઈ છે. સોસાયટીના રસ્તાઓ નદીઓમાં ફેરવાઈ ગયા છે અને ઘરોની અંદર ત્રણથી ચાર ફૂટ જેટલા ગળાડૂબ પાણી ભરાઈ ગયા છે. પૂરના પાણી ઘરોમાં ઘૂસી જતાં લોકોની આખી જિંદગીની કમાણી અને મોંઘીદાટ ઘરવખરી પલળીને સંપૂર્ણપણે નાશ પામી છે, જેના કારણે સ્થાનિક રહીશોમાં વહીવટી તંત્ર સામે ભારે આક્રોશ ફાટી નીકળ્યો છે.

ગ્રાઉન્ડ ઝીરો રિપોર્ટ: પોતાના જ આશિયાનામાં કેદ થયા લોકો

સ્થિતિની ગંભીરતાને જોઈને જ્યારે મીડિયાની ટીમ દ્વારા ગ્રાઉન્ડ ઝીરો પર પહોંચીને લાઈવ રિપોર્ટિંગ કરવામાં આવ્યું ત્યારે હૃદય કંપાવી દે તેવા દ્રશ્યો સામે આવ્યા હતા. સોસાયટીના રહીશો પૂરના પ્રચંડ પ્રવાહને કારણે પોતાના જ ઘરોમાં કેદ થઈ ગયા છે. નાના બાળકો, મહિલાઓ અને વૃદ્ધો ઘરની અંદર ફસાયેલા છે. પરિસ્થિતિ એટલી હદે વણસી ગઈ છે કે લોકોને પીવાનું શુદ્ધ પાણી, દૂધ કે જીવનજરૂરી ચીજવસ્તુઓ અને રાશન મેળવવામાં પણ ભારે મુશ્કેલીનો સામનો કરવો પડી રહ્યો છે. લાચાર બનેલા સ્થાનિકો મદદ માટે બારીઓમાંથી આજીજી કરી રહ્યા છે.

તંત્રના કાગળ પરના દાવાઓ પૂરના પાણીમાં વહી ગયા

સ્થાનિક લોકોનો આરોપ છે કે દર વર્ષે ચોમાસા પહેલા નગરપાલિકા અને સ્થાનિક વહીવટીતંત્ર દ્વારા પાણીના નિકાલ અને પ્રી-મોન્સૂન કામગીરીના મોટા-મોટા દાવાઓ કરવામાં આવે છે, પરંતુ આ સ્થિતિ સાક્ષી પૂરે છે કે તંત્રના તમામ દાવાઓ માત્ર કાગળ પર જ સીમિત હતા. વાસ્તવિકતામાં પાણીના નિકાલની કોઈ યોગ્ય વ્યવસ્થા ન હોવાને કારણે આજે આખી સોસાયટી ટાપુમાં ફેરવાઈ ગઈ છે.

હવે સવાલ એ ઊભો થાય છે કે શું આ આફત બાદ પણ સ્થાનિક વહીવટીતંત્ર કુંભકર્ણની નિદ્રામાંથી જાગશે અને ફસાયેલા લોકોને તાત્કાલિક રેસ્ક્યૂ કરીને બહાર કાઢશે? કે પછી આવી કુદરતી અને વહીવટી આફતોનો સામનો કરવા માટે નિર્દોષ સ્થાનિકોએ દર વર્ષે આવી જ રીતે લાચાર અને બરબાદ થતા રહેવું પડશે? હાલમાં તો સમગ્ર વિસ્તારમાં તંત્રની ઘોર નિષ્ક્રિયતા સામે લોકોમાં ભારે રોષ જોવા મળી રહ્યો છે.