હળવદ : મોરબી જિલ્લાના હળવદ પંથકમાં મેઘરાજાએ વિરામ બાદ અચાનક રૌદ્ર સ્વરૂપ ધારણ કરતાં સમગ્ર વિસ્તારમાં જળબંબાકારની વિકટ સ્થિતિ સર્જાઈ છે. હળવદ તાલુકામાં ટૂંકા સમયગાળામાં ગાજવીજ સાથે સાર્વત્રિક ૫ ઈંચ જેટલો આફતરૂપી વરસાદ ખાબકતાં ચારે તરફ 'પાણી જ પાણી'ના દ્રશ્યો જોવા મળી રહ્યા છે. આ તારાજીને પગલે તાલુકાનું રણમલપુર ગામ સંપૂર્ણપણે જળમગ્ન બની ગયું છે.
શેરીઓ બની નદી, ઘરોમાં ગોઠણસમા પાણી ભરાયા
મળતી વિગતો અનુસાર, હળવદના રણમલપુર ગામમાં અતિભારે વરસાદને કારણે ગામની મુખ્ય શેરીઓમાંથી નદીઓની જેમ ધસમસતા પાણી વહેવા લાગ્યા હતા. શેરીઓમાં ગોઠણસમા પાણી ભરાઈ જવાથી અને ચારેતરફ પાણીનો ઘેરાવો વધી જવાથી રણમલપુર ગામનો અન્ય વિસ્તારો સાથેનો માર્ગ સંપર્ક સંપૂર્ણપણે કપાઈ ગયો છે.
ઘરવખરી અને અનાજ પલળી જતાં જનજીવન અસ્તવ્યસ્ત
વરસાદી પાણી ઘરોમાં ઘૂસી જતાં ગ્રામજનોની ઘરવખરી, કિંમતી સામાન અને આખા વર્ષ માટે સંગ્રહ કરેલું અનાજ પલળીને વેડફાઈ ગયું છે. આ આકાશી આફતને કારણે સ્થાનિક લોકોનું જનજીવન સંપૂર્ણપણે ખોરવાઈ ગયું છે અને લોકો પીવાના પાણી તેમજ પાયાની જરૂરિયાતો માટે વલખાં મારવા મજબૂર બન્યા છે.
ગ્રામજનોની તંત્ર પાસે તાત્કાલિક રાહત અને સર્વેની માંગ
આવી મુશ્કેલ પરિસ્થિતિમાં ફસાયેલા રણમલપુરના ગ્રામજનોએ વહીવટી તંત્ર સામે ઉગ્ર અપીલ કરી છે. લોકોની માંગ છે કે સરકારી અધિકારીઓ અને તંત્રની ટીમ તાત્કાલિક ગામની મુલાકાત લઈ નુકસાનીનો સર્વે હાથ ધરે. આ સાથે જ અસરગ્રસ્ત પરિવારોને વહેલી તકે યોગ્ય રાહત, કેશડોલ્સ અને આર્થિક સહાય પૂરી પાડવામાં આવે તેવી લોકમાંગ ઉઠી છે. હાલ તો ગામલોકો તંત્રની મદદની આતુરતાપૂર્વક રાહ જોઈ રહ્યા છે.