પ્રવીણ વ્યાસ દ્વારા, મોરબી: મોરબી નજીક આવેલી રફાળેશ્વર જીઆઈડીસી (GIDC) માં એક સિરામિક ફેક્ટરી પરિસરમાં આજે બપોરના સમયે કાળજું કંપાવી દેનારી ભીષણ આગ લાગવાનો મોટો બનાવ સામે આવ્યો છે. અહીં આવેલી મેજિક સિરામિક ફેક્ટરીના ગોડાઉનમાં અચાનક જ વિકરાળ આગ ફાટી નીકળતા અફરાતફરી મચી ગઈ હતી. આ આગ એટલી પ્રચંડ હતી કે જોતજોતામાં તેણે આખાય ગોડાઉનને પોતાની ઝપેટમાં લઈ લીધું હતું, જેને પગલે ફાયર બ્રિગેડ દ્વારા તાત્કાલિક ધોરણે 'મેજર કોલ' જાહેર કરવો પડ્યો હતો.

વેરહાઉસ કોર્પોરેશનના ગોડાઉનમાં નાફેડનો વિપુલ જથ્થો હતો

મળતી વિગતો અનુસાર, મેજિક સિરામિક ફેક્ટરીની આ જગ્યા મગફળીનો જથ્થો રાખવા માટે ગોડાઉન તરીકે ગુજરાત વેરહાઉસ કોર્પોરેશનને ભાડે આપવામાં આવી હતી. આ ગોડાઉનમાં નાફેડ (NAFED) ની મગફળીની અંદાજે ૧,૫૯,૦૦૦ જેટલી બોરીઓનો વિપુલ જથ્થો સંગ્રહિત કરીને રાખવામાં આવ્યો હતો. આગની આ દિલધડક ઘટનામાં ગોડાઉનમાં રાખેલો મોટાભાગનો મગફળીનો કિંમતી જથ્થો બળીને સંપૂર્ણપણે સ્વાહા થઈ ગયો હોવાના પ્રાથમિક અહેવાલો મળી રહ્યા છે.

દવા છાંટ્યા બાદ ૮ થી ૧૦ દિવસથી ગોડાઉન સંપૂર્ણ સીલ હતું

ગુજરાત વેરહાઉસ કોર્પોરેશનના ગોડાઉન મેનેજર એચ. જી. રાઠોડના જણાવ્યા અનુસાર, આ ગોડાઉનમાં થોડા દિવસો પહેલાં જ ફ્યુમિગેશન એટલે કે અનાજ બગડે નહીં તે માટેની દવા છાંટવાની પ્રક્રિયા કરવામાં આવી હતી. આ પ્રક્રિયાને કારણે છેલ્લા ૮ થી ૧૦ દિવસથી ગોડાઉનના તમામ દરવાજા બારીઓ કડક રીતે પેક કરીને સીલ બંધ રાખવામાં આવ્યા હતા. આજે બપોરે ૧:૪૪ કલાકે આ બંધ ગોડાઉનમાંથી અચાનક જ ધુમાડાના ગોટેગોટા નીકળતા હોવાની જાણ થતાં જ વેરહાઉસ મેનેજર અન્ય ગોડાઉનથી તાત્કાલિક ઘટનાસ્થળે દોડી આવ્યા હતા અને ફાયર બ્રિગેડને આ અંગેની કટોકટીની જાણ કરી હતી. ગોડાઉન અંદરથી સંપૂર્ણપણે સીલ હોવાથી અને તેમાં કોઈની પણ અવરજવર ન હોવાને કારણે આગ કયા કારણોસર અને કઈ રીતે લાગી તે રહસ્ય હજુ સુધી અકબંધ રહ્યું છે.

આગ બુઝાવવા ત્રણ શહેરોની ૭ ફાયર ફાઈટર ટીમો મેદાને

આગની વિકરાળતા અને વિપુલ જથ્થાને ધ્યાને રાખીને કંટ્રોલ રૂમ દ્વારા મેજર કોલ જાહેર કરાતા જ મોરબીની ૦૪ ટીમો, વાંકાનેરની ૦૧ ટીમ અને રાજકોટની ૦૨ ટીમ એમ કુલ મળીને અલગ-અલગ ત્રણ શહેરોની ૭ ફાયર ટીમો તાબડતોબ ઘટનાસ્થળે દોડી ગઈ હતી. ફાયર ફાઈટરોના જવાનો દ્વારા સતત પાણીનો મારો ચલાવીને આગ પર કાબૂ મેળવવા માટે યુદ્ધના ધોરણે સખત જહેમત ઉઠાવવામાં આવી રહી છે. ગોડાઉન મેનેજમેન્ટના જણાવ્યા મુજબ, આગ સંપૂર્ણ રીતે બુઝાયા બાદ અને કૂલિંગ પ્રક્રિયા પૂર્ણ થયા પછી જ ખરેખર કેટલા લાખનો જથ્થો નાશ પામ્યો છે અને કુલ કેટલા રૂપિયાનું આર્થિક નુકસાન થયું છે તેનો ચોક્કસ આંકડો અને આખરી અંદાજ આવી શકશે.